Tura, Nohprah 07 : Ka kynhun nongrwai pop ba pawnam ha pyrthei, ka Vengaboys, kala pynkyndeh dik dik ia ki briew ba ieid tamasa da ka jingpynbna ba kan wan tem ban pynlynguh ha ka Megong Festival, ka ban long ha Baljek Airport, West Garo Hills.
Kane ka tamasa kan long naduh ka 7 tarik Nohprah haduh ka 9 tarik Nohprah bad ha kine ki lai sngi, kin don ki jingpyni nam ia ka kolshor ba riewspah ka thain, ka Jylla, ki jingialehkai pynbyrngia bad ka put ka tem ba khlem sangeh.
Kum ka kynhun kaba la paw bha namar ki jingrwai ba shongshit jong ka, ka Vengaboys kala thoh ha Facebook ba pynpaw ia ka jingthrang dik dik ban poi noh sha kane ka tamasa da kaba ong “India, are you ready to party this week?” (India, phi lah pynkhreh ban ia iakmen iarisa mynta ka taiew?). Kane ka jingthoh kala pynkyndeh hapdeng ki briew ba ieid ia kane ka kynhun bad ki nongleit tamasa ruh kumjuh.
Nalor ka Vengaboys, kiwei pat ki kynhun ki ban iatem ha kane ka tamasa ki kynthup ia u Armaan Malik, u nongrwai ba pawnam ka Parikrama, When Chai Met Toast nalor ki nongtem trai Jylla ba kynthup ia ka Riprap, Colours, Street Stories, Da Suraka, Wann Manda, G-Hills Finest, Saldorik & Dio, Eh Rngiew, Trance Effect, Nokpante, Avora Records, The Do.pos, Chegim Durama, Crack Gang.
Ia kane ka tamasa la pyniaid da ka RockskiEMG, City Flora bad Artsourced.
Kumban shu kdew, ka kynhun rwai Vengaboys kala pawnam kynsan kynsan ha ka pyrthei da ka jingpynmih ia ki jingrwai ba iaid iew bha ha ki snem 1990 bad kine ki jingrwai kiba iaid ryngkat ki jingtem kiba ktik ban pynkhih syngkai bad ki kti ki kjat, ki dei kiba pawnam kat haduh kine ki sngi ba mynta.
Kine ki jingrwai ki kynthup ia ka “We Like to Party,” “Boom, Boom, Boom, Boom!!,” “We’re Going to Ibiza.” Bad kiwei kiwei.
