Shillong, Nohprah 05: U Symbud Myntri Rangbah ka jylla u Bah Prestone Tynsong hynne ka sngi ula pyntip ba ka sorkar ka don jingthmu ban kyntiew kumba 15% ne 20% ia ka jingbhah mang tyngka haka rep ka riang jong ka snem ban wan, ban kyntiew iaka kam rep kam riang hapoh ka jylla.
“Ha u 2023-24 na ka T.900 Klur, ngi la kyntiew sha ka T.1194 Klur bad ha ka mang tyngka kaban sa wan, ngi kwah ban dang kyntiew shuh shuh sa 15% ne 20% bad nga ngeit skhem ba kane kan iarap shibun ban kyntiew ia ka tnad ka rep ka riang ba ngin nang kiew ha ka rep ka riang” ong u Symbud Myntri Rangbah haba kren haka jingialang pynhap pyrda ia ka Meghalaya Farmers Parliament kaba lai, kaba la long ha State Convention Center, Shillong.
U Bah Prestone ula ong, “Ki ri kiba don hapoh ka dewbah Europe, ki briew kiba riewspah tam ki dei ki nongrep bad kane ka ai mynsiem ia ngi ki nong Meghalaya ba ki nongrep ki dei u budlum jong ka ioh ka kot jong ka jylla jong ngi bad jong ka pyrthei baroh kawei bad ngi donkam ban pynlut por khambun bad ban kyntiew ia ka bhah mang tyngka haka liang ka rep ka riang”.
U Bah Prestone ula ong, ba ha ka Farmers Parliament la mynjur ia ka Resolution bad ia kane ka rai la shim hadien ba la dep ban iatai sani hapdeng ki nongrep bad ki heh ophisar ka jylla bad ka sorkar jylla kan sa shimkhia bha ia kane ka Resolution.
U Symbud Myntri Rangbah ula kren ruh ha kaba iadei bad ka jingeh ki nongrep kaba ki mad na ka jingshah ot kilo ki marrep haba ki leit die ha Iewduh ne kiwei kiwei ki iew.
“La bun tylli ki snem, ngi la iakren shaphang ka jingshah ot kilo ki marrep ha iewduh ne ha kiwei kiwei ki iew bad na ka liang jong ka District Council kila phah iaka jingpynkylla ha kaba iadei bad ka Establishment, Management and Control of Market Amendment Regulation Act 2021 bad u Lat ka jylla ula ai ia ka jingmynjur ia kane. Ngi la ai ka jingbthah ia ka District Council ba kan bthah ia ki Market Committee bapher bapher. Ka iew ka hat kadei ka sobjek kaba hap hapoh ka jingkhmih jong ka District Council hynrei don ki briew kiba kynnoh beit ia ka sorkar khlem da tip ia ka sobjek Market kadei jong ka District Council”.
“Nga la ai ia ka jingbthah sha baroh 3 tylli ki District Council jong ka jylla ba kin pynmih ia ka Regulation kaba khlain kat kum ka jingmynjur jong u Lat ka jylla bad ka sorkar jylla ban pyntreikam ia ka ha kwei pa kawei ka Market Committee bad kawei na ka kyndon ka long bym dei ban khate lane ban ot ia ki marrep marriang na ki nongrep. Nga pynthikna ha phi ba watla kam dei ka sobjek jong ka sorkar jylla hynrei ngin buddien bad ngin sa phah ruh ia ki jingbthah bad notis sha ki bor pyniaid district ba kin buddien lem ia kane ka kam khnang ba ki nongrep kin ia bit kinia biang” ong u Symbud Myntri Rangbah.
Ha kane ka jingpynhap pyrda ia kane ka jingialang jong ka Farmers Parliament la iadonlang u MLA ka Mawkynrew u Bah Banteidor Lyngdoh uba long u Myntri sorkar barim ka jylla uba khmih iaka rep ka riang, ki nongialam ka Hills Farmers Union, ki heh ophisar sorkarbad ki nongrep kiba na ka kylleng ki bynta jong ka jylla Meghalaya.
