Shillong, Nohprah 05: Ka seng Bharatiya Janata Party (BJP) ka lah ban pynieng da ki Kynthei ha ka elekshon MP Lok Sabha na Shillong bad Tura Parliamentary Constituency ka ban long ha u snem ban wan.
Katkum ki khubor kiba la iohlum na ki katto katne ngut ki nongialam ka BJP, kila iathuh ba ka BJP ka don ia ka jingthmu ba ha kane ka kynti, kan pynieng da ki kynthei ha ka elekshon MP Lok Sabha na baroh ar tylli ki Constituency kiba don ha Meghalaya.
Ki khubor ki iathuh ba ki nongialam ka BJP kila iakren bad ka Ferlene Sangma kaba long ka MLA barim na rilum Garo ban iakhun ia ka elekshon na Tura bad na ka bynta ka Shillong Parliamentary Constituency ki nongialam ka BJP ki dang iaid shakhmat ban iakren bad ka Kong Finela Lyngdoh Nonglait ban iakhun ia ka elekshon MP Lok Sabha.
Ki nongialam ka BJP kila iathuh ba ka jingiakren ka dang iaid shakhmat haduh mynta bad kim shym la treh pat ban iathuh eiei, la kine ki ar ngut ki kynthei kila mynjur ne kyntait ban iakhun ia katei ka elekshon.
Ka jingthmu jong ka BJP ban pynieng da ki kynthei ha ka elekshon Lok Sabha ban wan ka dei kaba la leh ban bud ia ka jingai bhah kyrpang ka Sorkar Pdeng ia ki Kynthei kaba long 33% ban iakhun elekshon.
Lah ban ong, ba ka seng NPP kadei ka seng saiñ pyrthei kaba nyngkong eh hapoh ka jylla kaban pynbna paidbah ba kan pynieng da ki 2 ngut ki kynthei haka elekshon MP Lok Sabha kaba kynthup ia ka Agatha Sangma na Tura bad ka Kong Ampareen Lyngdoh na Shillong Constituency.
Katba ka seng VPP kala pynbna ban pynieng da u Bah Ricky A.J.Syngkon ban iakhun ia ka elekshon MP Lok Sabha na Shillong Constituency.
