Nongpoh, Nohprah 01 : Ka Myntri ka Koit ka Khiah Kong Ampareen Lyngdoh, hynne ka sngi Thohdieng, kala iakynduh ia ki Nongialam Shnong ka Ri-Bhoi kiba don hapoh ka lama jong ka Synjuk ki Rangbah Shnong ka Them Ri-Bhoi, ban iamir jingmut halor ki lad ki lynti ban nang pynjanai bad pynbit pynbiang ia ki jaka ai jingsumar paidah kiba don ha ka District.
Ia kane ka jingialang la pynlong hapoh ka Conference Hall jong ka tnad DRDA ha Nongpoh ha ka jingiadonlang ruh u MLA ka Nongpoh Bah Mayral Born Syiem, u ba dei ruh u Chairman ka Advisory Board ka tnad Koit ka Khiah bad kiwei kiwei.
Ki mat ba la ioh ban iathir ha kane ka jingialang, ki kynthup naduh ka jingkyntiew ïa ka koit ka khiah ha ka district, ban plie noh ïa ki jaka sumar ba kongsan kum ka Maternity and Child Health Hospital ha Umran Parila, ka Emergency and Trauma Center ha Civil Hospital Nongpoh, ban pyntreikam noh ïa ka Minor Operation Theatre ha Bhoirymbong CHC, ban buh ruh kawei ka jaka sumar bad syllok ïa ki samla bala ngop haki jingdih buaid, bad kiwei kiwei ki jingdonkam ban kyntiew ïaka jingshakri haka liang ka koit ka khiah.
Haba kren bad ki Nongthoh Khubor, u Bah BB Makdoh bad u Bah PB Sylliang kum ki nongialam ka SKRS, Ri Bhoi District ki la pynpaw ia ka jingkmen kaba khraw ban sakhi ia ka jingshimkhia hi da ka Myntri ban ai ka jingiatreilang bad ki nongialam shnong ka district ha kaban pynjanai ia ki jaka ai jingsumar ha ki shnong ki thaw bapher bapher.
Ki la pynpaw ruh, ba ha kane ka jingiakynduh, la ioh ban mir jingmut halor ka jingkyntiew kyrdan ia ki Sub Centre sha ki PHC bad ki PHC sha ki CHC kiba la deihok ban ioh ia ka jingkyntiew kyrdan, kiban pynmyntoi ruh ia ki paidbah nongshong shnong ha kylleng ki shnong jong ka district Ri Bhoi District.
“Ngi la ioh ban ia mir jingmut ban plie noh ia ka MCH hospital ha Umran Parila bad ngin sa hiar jurip lang ha ka 4 tarik Nohprah ban peit ia kiei kiba dang donkam ban pyndep” ong ki nongialam ka SKRS.
Ha kane ka sngi, ki nongialam ka Synjuk ki Rangbah Shnong ki la aiti ruh da ka dorkhas hakhmat ka Myntri ban buddien ïa kitei ki kam kiba ka Synjuk kala buh hakhmat ban pynurlong noh.
