Shillong, Naiwieng 30 : Ka Kyrtong iakhun elekshon Lok Sabha jong ka NPP na Shillong Parliamentary Seat, Dr Ampareen Lyngdoh ha ka sngi Palei, kala kyntu ia ki seng sain pyrthei ba kin kiar na ka jingshim kabu na ka case ba iadei bad ka jyrsieh thungkam nonghikai, kaba dang don hapdeng ka jingbishar ka Iingkashari.
Haba iakren bad ki Nongthoh khubor, ka Dr Ampareen kala pynshai ba kam pat shah pynngat satia kum ka nongdonkti ha kane ka case. Kane ka case ka dang don mynta hapoh ka jingbishar ka Iingkashari.
“Kan long subjudice ia ka ban kren eiei halor jong ka. Hynrei, ngam pat ju shah pynngat satia ha kano kano ka khep. Ai ban nym don ki seng sain pyrthei ki ban shim kabu ia kane bad pynman ia ka kumba nga la shah pynngat” kala ong haba bynrap “Ka jingshisha ka long halor ia baroh, nga ieng halor kata. Ngan ym kren than ia kane hynrei nga ngeit skhem ba ka jingshisha kan sa mih kumba ka long. Wat pyndonkam ia kane namar kan sa poi ka por ba kan don ka jingktah na baroh kine kiei kiei. Ngan ym kren than”.
Haba pynpaw ba ym ju don satia u briew ba shah pynngat kam bymman khlem da lah ban pynshisha, kane ka MLA bala san samoi ka Jylla kala ong “ Pyndonkam ia ka, kawang ktieh katba mon, ngam sheptieng satia namar nga la leh shibun ki kam ba kham khraw. Bad haba nga leit sha Iingkashari, nga tip ia kaei kaba la iakren, ym u briew ha surok ne u politician uban pyrshang ban iakhun ia nga da kata. Nga long kaba la khreh, wan ngan ieng iakhun beit”.
