Guwahati, Naitung 25 : Ha ba pynpaw halor ka jingkhot aijingkyrshan ka kyrtong liang pyrshah ka Margaret Alba na ka bynta ka ilekshon Vice President, na ka liang u Myntri Rangbah (CM) ka Assam u Himanta Biswa Sarma u la ong ba um don bynta ei ei ruh ha kane ka ilekshon Vice President jong ka ri India ka ban long ha ka 6 tarik u Nailar u ban wan.
Na ka liang kane ka kyrtong Vice President ka liang pyrshah kham hashwa ka la kam ba ka la iakren bad ki katto katne ki CM kum u CM ka Assam u Himanta Biswa Sarma, u CM ka Uttar Pradesh u Yogi Adityanath bad u CM ka Karnataka u Basavaraj Bommai ban pan jingkyrshan na ka bynta kane ka ilekshon.
Ha ba pynpaw lyngba ka Twitter, u CM Sarma u la ong; “Ka Smt Margaret Alva ka la kren ia nga hynne ka step. Nga la ong ha ka ba ngam dei satia u dkhot jong ka electoral college. Kumta ruh ngam don bynta ha kane ka ilekshon jied Vice President jong ka ri India.”
Ka Alva ka la ong ruh ba ka don ia ka jingthmu ban kyntu ia u Myntri Rangbahduh (PM) Narendra Modi bad ia u heh nongialam ka BJP u JP Nadda na ka bynta ban ai ka jingkyrshan ha kane ka ilekshon jied Vice President ka ban wan.
“Nga la sdang ban iakren bad ki CM jong baroh ki jylla ki ba ai jingkyrshan na ka bynta jong nga, hynrei ngan iakren ruh bad ki CM ki bym shym la aijingkyrshan na ka bynta jong nga. Ngan iakren ia u CM ka Karnataka, CM ka Assam bad wat ia u CM ka UP,” ong shuh shuh ka Alva.
Ha ka sngi Thohdieng ba la lah ka Alva ka la kynthoh ruh ia ka jingshim rai jong ka TMC ban ym leit iashim bynta ha ka ilekshon V-President.
Ha ka ba sdang jong ka taiew ba la lah na ka liang u heh ka TMC, u Abhishek Banerjee u la ong ba ka party jong u ka la shim ia ka rai ban ym iashim bynta ha ka ilekshon jied vice president ka ban sa long shen.
Ha kawei pat ka bynta, u kyrtong ka National Democratic Alliance’s (NDA) u dei u Lat barim ka West Bengal u Jagdeep Dhankhar.
