Shillong, Naiwieng 21 : U Myntri Rangbah ka Jylla Conrad K Sangma lem bad u Myntri Khynnah ka Tnad Tourism Shripad Yesso Naik, kila plie paidbah ia ka International Tourism Mart (ITM) ba 11 hynne ka sngi ba-ar ha Shillong.
Ia kane ka ITM ka ban kut ha ka 23 tarik Naiwieng, la pynlong ha Lariti International Centre for Performing Arts & Culture.
Haba kren ha ka jingialang,u Yesso Naik ula ong ba ka Meghalaya ka dei ka Jylla kaba itynnad bha bad kaba don kyrhai ia ka spah mariang kaba lah ban khring ha ki kam shangkai bad ruh ka kam sawari ha ki shnong ki thaw bad ka jingthmu jong ka ITM ka long ban wanrah ia ka jingiatreilang hapdeng ki Agency ka Sorkar bad ki kynhun bapher bapher.
“Mynta u snem ka ITM ka iapher bha ha kiba bun ki liang, hadien ba pynsangeh la bunsnem, ki International Tour Operators, Blogger kila wan ban iashimbynta ha kane ka kynti ba mynta. Ka thain NE kala paw kum kawei na ki jaka shang sawari ba pawnam bha hapdeng ki nongshangkai, ki riew ieid kolshor, ieid mariang, ieid tamsa bad kiwei kiwei” ong u Naik.
Haba iakren bad ki nongthoh khubor, u Mytri Khynnah ula ong ba ka kam shang sawari ka don ia ka bynta kaba khraw bha ha ka liang ban pynroi ia ka thain.
Ula iathuh ba kane ka Sorkar ba mynta hapoh ka jingialam u Narendra Modi kala phaikhmat bha sha kane ka thain jong ka Ri bad ula theh shibun ki kam pynroi ia kaba la paw ha kine ki snem bala leit noh.
U Myntri Rangbah ka Jylla Conrad K Sangma haba pdiang ia baroh ki nongwan iashimbynta, ki samla pule bad ki kynrem ki lyndan, ula ai khublei ia ka Ministry of Tourism ka Sorkar India kaba la jia ia ka Shillong ban pynlong ia ka International Tourism Mart ba 11.
U Myntri Rangbah ha ka jingkren jong u, ula ong ba ka jingkiew ka roi ka par ba ka thain kala sakhi ka dei ka bym pat lah thew shuh. “Ha kiba kiba bun ki snem, ka jingai jingkyrshan jong u Myntri Rangbah Duh ka Ri bad ki Ministry bapher bapher ka dei ka bym lah thew shuh. Ka don ka jingpynleit jingmut kaba khlain bha sha ka thain ban pynthikna ba ki Jylla ka thain ki iaid ryngkat ryngkat bad ki Ri jong ka Ri bad ban pynthikna ruh b aka roi ka par ha ka ioh ka kot ka poi hapoh kane ka thain”.
Haba mynjur ia ki jingmyntoi kiba bun ba lah ban ioh na ka kam shang sawari, u Conrad ula ong “Ka kam shang sawari ka dei kawei na ki kam kiba lah ban pynkha ia ka jingaikam aiam ia ki samla kiba wad kam manla u snem. Ka kam shang sawari ka dei kawei na ki paia jong ka policy ha ka ioh ka kot bad ki prokram jong ka Sorkar jong ngi”.
