Shillong, Naiwieng 21: Ka Sorkar Jylla kan sa thoh shen sha ka National Council of Educational Research and Training (NCERT) ba kyrpad ban ai jingbit (copyright) ha kaban pyndonkam lang ia ki kot jong ka naduh klas I-X naduh ka samoi long skul ban wan.
U Myntri ka Tnad Pule Puthi Rakkam A Sangma ula ong “Ngi la rai ban sa thoh noh mardor sha ka NCERT ba kan ai jingbit copyright”.
U ong ba ka Sorkar Meghalaya dang shen kala rai ban pyndonkam noh ia ki kot ka NCERT naduh klas I-X. Shuwa kane, ka Sorkar kala shim ia kane kajuh ka sienjam na ka bynta ka klas XI bad klas XII naduh u snem 2018.
“Ngi la pynlong ia ka jingialang buddien hynne ka sngi namar shuwa ban sdang ka samoi ban wan, ngi hap ban long kiba la khreh haba iadei bad ki kot ba dei ban ioh hapoh ka shiteng bnai jong u Rymphang” ong u Rakkam haba bynrap “Shisien ba ngi la ioh copyrights, ngin sa shim ia ki sienjam ba donkam bad ngin sa phah shon ia ki kot”.
Nalor kane, u Myntri ula pyntip ruh ba ka Tnad kala thung ia ka scrutiny committee.
“Ka Committee kan shong bishar bad ki stad ki jhad jong ngi halor ki kot ba mynta jong ka NCERT, ha kaban khmih la ki don ne em kino kino ki bynta ne ki lynnong ki bym iahap bad ka jinglong jingman ha Jylla. Ia kine kiei kiei baroh yn sa shong bishar da ka Committee” ula ong.
Haba pynpaw ba ka Sorkar kala trei shitom ban wanrah hi dal aka jong ka curriculum ka Jylla kham kloi kat kaba lah, u Rakkam ula ong “Shisien ba ngi la don la ka jong ka curriculum, ka MBoSE, DERT bad ka Tnad Pule Puthi kin sa pynmih iala ki jong ki kot ki ban bynrap, weng ia ki lynnong na ki kot ka NCERT kat kum ka jingdonkam hapoh ka Jylla”.
“Ngin ym pyntreikam pura satia ia ki kot ka NCERT kumba ki long hynrei ngin sa bynrap ruh ia ki jingthoh kiba iadei bad la ka jong ka Jylla” ula bynrap.
