Shillong, Naiwieng 21: U Myntri ka Tnad Pule Puthi Rakkam A Sangma ula pyntip ba ka Sorkar Pdeng ka lah ban pyllait noh napoh ka shitaiew-artatiew eiei ia ka scholarship jong ki khynnah pule.
Haba iakren bad ki nongthoh khubor, u Rakkam ula ong “Ka pos matric scholarship ka dei kaba la bei da ka Ministry of Tribal Affairs kaba long kumba 90:10 ka bhah bad na ka liang ka Sorkar Jylla, kala pyndep ia baroh ki jingdonkam bad kala phah ruh ia ki UC bad ngi la khmih ban ioh ioh noh ia ka scholarship hapoh ka shitaieew-artaiew eiei”.
“Hadien bala pyllait ia ka pisa da ka Ministry, ngin sa pynthikna mardor ba yn pynthep noh ia ka pisa sha ki account jong ki khynnah pule” ula ong.
U Rakkam u pyntip ba ka Tnad kala ioh pdiang ia ki jingujor ba bun ki samla pule kin dang ban ioh ia ka scholarship halor kiba bun ki daw. U pyntip ba ha ka sngi Thohdieng bala lah, ki Ophisar jong ka Tnad kila shong jingialang bad ki nongmih khmat jong ki Bank halor kane ka kam.
“Ngi la bthah ia ki Bank ban ai jingtip ia ngi halor ki jingeh ba ki iakynduh haba iadei bad ki bank account namar ba bun ki bank account jong ki samla pule ki don jingbakla, bakla ka IFSC bad kiwei kiwei.
Ngi la kyntu ia ki Bank ba kin ai sha ngi ia baroh ki jingtip khnang ba ngin lah pyntip sha ki samla pule. Kane ka dei kaba long ba man mynta bad ngi khmih lynti ban sa pyndep noh ia baroh ki kam hapoh ka 2-3 taiew” ula ong.
