Shillong, Naiwieng 15 : Tang hadien khyndiat sngi ba ka Ministry of Home Affairs (MHA) kala pynphai ia ka Meghalaya Residents Safety and Security Amendment Bill (MRSSAB), 2020, da kaba kdew ia ki katto katne ki daw, kala paw pyrthei mynta ba ka jingbym ai jingmynjur ka dei namar ki kyndon ban pynieng ia ki Entry-Exit Point kiba la kdew ha ka Bill.
U Symbud Myntri Rangbah ka Jylla ba khmih ia ka Tnad kam Pohiing Bah Prestone Tynsong, ha ka sngi Balang, ula pyntip halor ki jingsngewkhia bala pynsngew da ka MHA sha ka kynhun jong ka Hynniewtrep Youth Council (HYC).
Ka Sorkar Pdeng ka don jingsngew ba kino kino ki ain ne kyndon bala pyntreikam da ka Sorkar Jylla kim dei ban don jingktah ne pynthut ia ka rung ka mih ki briew shapoh ka Jylla.
Haba pyntip ba kila iakynduh ia u Myntri kam Pohiing ban pan ia ka jingpynshai halor ka rai jong ka MHA bad ka jinglong jingman ka MRRSAB, 2020 kumba long mynta, u President ka HYC Roy Kupar Synrem ula ong “U DyCM ula iathuh ha nga ba ka MHA ka don ia ki jingsngew bym iahaphaba phai sha ka jingpynieng ia ki Entry-Exit Point lane ki khyrdop kat kum ki kyndon ka Ain (Namar ba) ki khyrdop kin pynthut ia ki briew kiba kwah ban rung shapoh ka Jylla”.
Nalor kane, ula ong ba ka MHA kala buh ruh ia ka jingbthah ba kino kino ki Bill ne ki Act kiba la shna da ki Sorkar Jylla kim dei ban iai pyrshah lane long pyrshah ia ka Act bala mynjur da ka Parliament.
U Bah Roykupar ula iathuh ba ka HYC kala kyrpad ia u Symbud Myntri Rangbah ka Jylla ba un ai lem ia ka copy jong ka shithi ka MHA khnang ba ki ruh kin lah ban ai jingmut lem sha ka Sorkar.
Ha kajuh ka por, ka Sorkar Jylla kala rai ba shen kan sa khot ia ka jingialang bad ki kynhun bapher bapher ban iashong bishar biang ia ka Bill bad ban pynkylla thymmai kat kum ki jingbthah bad jingpynsngew jong ka MHA.
U Bah Roykupar ula pynpaw ba ia mynta hi um kwah satia ban kynthoh tam halor ka shithi ka MHA hynrei ka jingdawa jong ka HYC ia u Lat ka Jylla ka long ba un ai ia ka jingmynjur ia ka MRSSAB, 2020 kham kloi kat kaba lah.
