Shillong, Naiwieng 10: Kum shi bynta ban iaid ryngkat lang bad kiwei ki Jylla ka Ri India bad kiwei ki Ri ha satlak ka Pyrthei, ka sorkar pdeng kala iai kyntu iaka sorkar Meghalaya ban wad ki lad lynti kumno ban pyndonkam noh daki bor ki ban iai neh beit ban pynmih bording lyngba ka bor sngi (Solar), ka bor lyer bad Thermal.
Lah ban kdew ba kiwei ki ri kum ka Germany, Japan bad Australia ki iai pyndonkam da kine ki bor ban pynmih bording nalor ki Dam bad kane ka pynlong ia kine ki Ri ban riew spah ban die iaki bording sha kiwei pat ki Ri.
Kum shi bynta ban pynkhlain iaki lad ban pynmih bording, ka sorkar pdeng lyngba ka tnat Ministry of Power kala lum ka jingialang jong ka National Conference of Power and Renewable Energy kaba la long naduh 6-7 tarik Naiwieng ha Bharat Mandapam New Delhi.
Haba kren sha ki lad pathai khubor u Myntri ka tnat bording ka Meghalaya u A.T Mondal ula iathuh ba ha kine ki sngi kala sdang kiew ka jingdawa donkam bording hapoh ka Jylla bad ula pynsngew ruh ia kane haka National Conference.
U Mondal ula iathuh ba haka jingialang jong ka National Conference u Myntri ka tnat bording ka sorkar pdeng u R.K Singh ula kyntu iaki Myntri ka tnat bording ki sorkar Jylla ban phai khmat sha ki rukom pynmih bording lyngba ka bor sngi (Solar), ka bor lyer bad Thermal namar kine kin iai neh baroh shi junom.
Haba iadei bad ka jingkyntu ka sorkar pdeng ban ban phai khmat sha ki rukom pynmih bording lyngba ka bor sngi (Solar), ka bor lyer bad Thermal, u Myntri ka tnat bording ka Meghalaya u A.T Mondal ula iathuh ba ula pynsgew sha u Myntri ka sorkar pdeng haba iadei bad ka jingeh ka Meghalaya ban phai khmat sha ki rukom pynmih bording lyngba ka bor sngi (Solar), ka bor lyer bad Thermal.
“Haka jingialang jong ka National Conference ha New Delhi, nga la kyntu iaka sorkar pdeng ban tei daka Institute ha Shillong ban iarap iaki sorkar ki jylla ka thain shathei lammihngi (North East) ban iaphylliew jingmut, haba iadei bad ki sienjam ban shim naka bynta ban sdang phai khmat sha ki rukom pynmih bording lyngba ka bor sngi (Solar), ka bor lyer bad Thermal” la ong u Mondal.
U Mondal ula kubur ba ka jingpyntrei iaki jingtei ban pynmih bording lyngba ka bor sngi (Solar), ka bor lyer bad Thermal kam dei kaba suk bad kine ki Project kidei kiba rem bha bad dei namar kane, ki sorkar jylla ka thain shathei lammihngi (North East) kila kyntu ruh iaka sorkar pdeng ban iarap pisa iaki sorkar jylla.
Haba kylli halor ka rai jong ka sorkar pdeng, u Mondal ula ong “Naka liang u Myntri ka tnat bording ka sorkar pdeng u R.K Singh ula kular ban eksamin iaki jingdawa ki sorkar ki jylla ka thain shathei lammihngi (North East) bad shen un sa lum biang iaka National Conference ban ai jingmut kumno ban iaid shakhmat”.
