Jowai, Naitung 22: Ka Behdieñkhlam jong ka Raij Tuber kaba la long ha Biar Aitnar kala kut noh hynne ka sngi ha kaba da ki hajar ngut ki paidbah kila wan ban iashimbynta khamtam haba kane ka jingioh iashimbynta ka jongki kala long hadien ar snem namar ka jingdon jong ka jingsaphriang ka khlam jingpang.
Ki shnong ki thaw na kylleng jong ka Raij Tuber kiba kynthup iaka East bad WestJaintia Hills kila iashimbynta ha kaba kila rah ruh ia 60 tylli ki Rot ne ki Tableau.
Kane ka lehniam Behdieñkhlam kadei kaba heh tam ha rilum Jaiñtia kaba la wan ban iashimbynta da kito kiba dang bat iala ka niam ka rukom tynrai ne ki Niamtre bad ia kane ka lehniam la sdang naduh ka 19 tarik u Naitung ha kaba la pyndep ia ki jinglehniam lehrukom bapher bapher.
Watla u Myntri Rangbah ka jylla u Conrad Sangma ym shim la lah ban don ryngkat ha katei ka lympung namar ba u don ha Delhi ha ka jingialang pynkup burom iaka Draupadi Murmu kaba la shah jied kum ka President ka ri India, kumta u Conrad u la phah iaka kyrwoh khubor lyngba ka Video sha ki paidbah.
Ki heh ki hain kiba la leit ban sakhi ia ka Behdeinkhlam ki kynthup ia u Myntri ka tnad PHE u Bah Renikton L Tongkhar, u Myntri ka tnad Social Welfare u Bah Kyrmen Shylla, u CEM ka JHADC u Bah Thombor Shiwat, ki MDC, u Dolloi ka Elaka Jowai u Bah Puramon Kynjing, ki heh ophisar sorkar bad kiwei kiwei.
