Shillong, Naitung 22: Hadien ka jingbym iohlad ban pynlong iaka jingiakob thei bhabriew ha kine ki arsnem kiba la dep namar ka jingsaphriang ka Khlam COVID-19, mynta ka kynti ka jylla kala pynkhreh ban pynlong ia ka jingiakob Miss Meghalaya 2022 kum shi bynta ban ailad ia ki thei bhabriew ka jylla ban iakhun ban ioh phong ia katei ka pansngiat.
Ia katei la pynbna da ka Miss Meghalaya Organization ka Aakriti Shen kaba long ruh ka samla kaba dang bat iaka nam Miss Meghalaya bad kala iathuh ruh, ba mynta ka kynti lyngba katei ka jingiakob thei bhabriew kan don bun ki lad na ka bynta ki thei samla kiban aireng ia ka nam Miss Meghalaya 2022.
Kala ong ba ia katei ka jingiakob yn pynlong ha u Nailur 2022 bad lyngba kane ka jingiakob, ki theisamla kin ioh iaka jinghikai bad jingpyntbit na ka bynta ka jingiakob thei bhabriew jong ka thaiñ North East kaban long ha u bnai Risaw mynta u snem ha Kohima Nagaland.
Ka la ong, ka Miss Meghalaya mynta u snem ka long ruh kaba iahap ruh bad ka jingrakhe iaka jubili ksiar jong ka jingdap 50 snem ka jylla Meghalaya bad kumta ka mat pdeng jong kane ka jingiakob kan don jingiadei bad katei ka jingrakhe dap 50 snem ka jylla.
Ka Aakriti kala ong, ka Audition jong katei ka jingiakob thei bhabriew kan sdang haka 20 tarik u Nailar ha Youth Hostel, Lower Lachumiere naduh ka por 10 baje mynstep bad kiba iashimbynta ha katei ka jingiakob kidei ban dei ki nongshong shnong ka Meghalaya kia don iaka rynnieng kaba jrong 5.3 phut, hapoh 25 snem ka rta bad ki bym pat shongkurim.
Kala ong, ka nongjop iaka nam lahduh ka nioh iaka buskit T.1 lak, ka 1ST Runner Up kan ioh T.50,000 bad ka 2ND Runner Up kan ioh T.25,000 bad kan don ruh ka jingsam ia ki khusnam bapher bapher, katba ka nongjop bad kaba wan 1st Runner Up kin ioh ia ka lad ban mihkhmat ia ka jylla Meghalaya ha ka Miss Northeast 2022.
