Shillong, Naiwieng 07: Ka Jal Diwali -“Ka Campaign ki longkmie na ka bynta ka um, ka um naka bynta ki longkmie” hapoh ka Housing and Urban Affairs, jong ka Sorkar Pdeng, kala sdang hynne ka sngi Baar ha ka jylla lyngba ka jingrakhe ha Urkhla Water Treatment Plant, Jowai.
Ka tnat Housing and Urban Affairs jong ka Sorkar Pdeng ka dang pynlong ia ka ‘Campaign ki longkmie na ka bynta ka um, ka um naka bynta ki longkmie’ ban rakhe ia Jal Diwali naduh ka 7 tarik haduh ka 9 tarik u Naiwieng, 2023.
La ialam ia ki dkhot jong ki SHG jong ki longkmie DAY-NULM sha ki jaka pynkhuid um ne ki Water Treatment Plant (WTP) ba kin sngewthuh ia ki rukom treikam ha ka jingpynbiang ia ka um kaba khuid bad kaba shngain sha ki longing bad ka jingthmu jong kane ka jingleit sha kine ki jaka kadei ban wanrah ia ka jingsngew trai ha ki longkmie ha kaba iadei bad ki jingdon jingem kiba iadei bad ka um.
Kane ka jingleit ha Jowai ka la sdang da ka jingai jingkren da ka City Coordinator, DAY-NULM, Jowai ka Kong Emica S. Rymbai kaba la pdiang burom ia ki ophisar na AMRUT, DAY-NULM, PHE bad ki SHG kiba la wan iashim bynta ha kane ka prokram.
Ha ka jingiakynduh bad ki paidbah, ki ophisar na ka AMRUT, ki nongpyniaid na ka jylla bad ka nongbah kila batai shaphang ka thong jong kane ka campaign bad ka jingdonkam jong kane ka jingleit peit ia kine ki jaka pynkhuid um.
Kila pynshlur ia ka jingiashim bynta ha kane ka prokram khnang ban pyniar ia ka jingsngewthuh shaphang ka kam pynpoi um ha ka nongbah jong ki.
U SDO, PHE ba dei peit ia kane ka jaka pynkhuid um, u Bah Roskil Challam u la pyni bad ai jingbatai ia ki ophisar bad kito kiba wan iashim bynta bad ki nongiashim bynta ki la ioh ruh ia ka lad ban kylli jingkylli ia ki ophisar shaphang kane ka jaka pynkhuid um.
Ia ka Jal Diwali yn pynlong ha 3 tylli ki ULB ha kylleng ka jylla Meghalaya ha kaba yn leit peit ia ki jaka pynkhuid um naduh ka 7 haduh 9 tarik u Naiwieng, 2023 bad la pynkhreh ban don kum kane ka jingleit peit ia ki jaka pynkhuid um ha ka 8 bad 9 tarik u Naiweing ha ka Mawphlang bad Nongstoin ULB.
