Shillong, Naiwieng 06: Ka Sorkar Jylla kala rai ban shong bishar ia ka jingtreikam jong ki Civil Hospital bad ki District Hospital ka Jylla hapoh ka 36 bnai nalor ban leh eiei ruh halor ka jingduna ki doktor specialist da kaba ai ia ki song kiba biang.
Ia kane ka rai la shim ha ka jingialang bala pyniaid da u Myntri Rangbah ka Jylla Conrad K Sangma ha ka jingiadonlang ka Myntri ka Koit ka Khiah Kong Ampareen Lyngdoh bad ki Heh ka Tnad ka Koit ka Khiah hynne ka sngi Nyngkong.
Haba iakren bad ki nongthoh kbubor, ka Kong Ampareen kala pyntip ba ka jingialang ka dei eh halor ka jingbishar ia ka jingtreikam jong ki Civil Hospital bad ki District Hospital hapoh ka Jylla. Ka Sorkar kala shong bishar ia kaei kaba don ha kine ki jaka sumar, ka jingshakri bad ki jingdonkam haba phai sha ki jingtei.
“Ngi la aipor ialade kumba 24-36 bnai bad ngin sa peit ia ka jingtreikam kat kum ka jingiaid ka por” kala ong.
Haba pynpaw ba ka jingdonkam ba kongsan eh ha ki hospital ka Sorkar ka dei ka kam ba iadei bad ki nongtrei, ka Myntri kala ong “La pyntip ia u CM halor ka jingduna ki paramedical staff, jingduna ki doktor specialist bad ki medical”.
“Ngin ap mynta ia ka jingiakren biang bad u Myntri Rangbah ban peit ia kiwei pat ki kam kiba hap ban shimkhia bad kaei ka jingiarap song pisa kaba donkam ba ka Sorkar kan ai khnang ban pynthikna ba ki lad jingsumar jong ngi kin long kiba kham biang” kala bynrap.
Ka Myntri kala pyntip ruh ba ka tnad kala aiti ia ka jingtyrwa kaba bniah ba kumno yn pynthikna ia ka jingwan jong ki doktor Specilist ban shakri ia ka Jylla Meghalaya kum ki doktor Sorkar.
Ka pyntip ba ka Sorkar kala rai ban wanrah noh ia ka policy ban pynthikna ba baroh ha ka Tnad ka koit ka Khiah kin dei ban mad ia ki jingbhah kam sha ki jaka kiba jngai.
