Tura, Naiwieng 05 : U Myntri Rangbah ka Jylla Conrad K Sangma, ula ai ka jingiaroh ia ka Balang Katholik halor ka jingnoh synniang kaba khraw eh ban kyntiew ia ka pule dangle bad ha ka liang ka koit ha Jylla khamtam ha Ri-lum Garo.
U Myntri Rangbah ka Jylla ula pynpaw ia ka jingsngewnguh ia ka Balang Katholik ha ka jingkren hapoh ka jingialang rakhe ia ka Jubili Ksiar jong ka Tura Diocese hynne ka step Sngi U Blei hapdeng ki hajar phew ngut ki riewngeit ka Balang.
Ia ki phew hajar ki riewngeit ka Balang Katholik ka Ri-lum Garo, ka 5 tarik Naiwieng ka dei ka sngi ban sah jingkynmaw beit ha ka mynsiem bad ka jingmut jingpyrkhat jong ki naba ka dei ka sngi Ainguh ia u Blei Nongbuh Nongthaw halor ka jingwan jong ka Balang hapoh ka thain-ka Tura Diocese, ka Balang Katholik ba nyngkong eh bala wan ha u snem 1973.
Ia kane ka sngi la rakhe da ka jingkmen, ka jingphuh jingphieng ha kaba ki riewngeit na baroh ki kyndong kynshrotka ri-lum Garo kila iamih naduh ka por 7 baje mynstep ban iashimbynta ha ki prokram ba kyrpang kynthup ia Eucharist.
Ka dei ruh ka sngi ban phaidien bad kynmaw ia u missionary ba nyngkong eh uba la wan iuhkjat ha Ri-lum Garo ha uu snem 1933 ban ialap ia ka Gospel bad seng nongrim ia ka Balang ba kan pynphriang ym tang ia ki kam Balang hynrei wat ha ka pule ka dangle bad ki lad sumar sukher ha ka koit ka khiah.
U Archbishop ka Guwahati John Moolachira ula ialam ia ka Eucharist ban rakhe bad kyrkhu ia ka jingrakhe jubili ksiar jong ka Tura Diocese hynne ka step.
U Myntri Rangbah ka Jylla Conrad K Sangma, uba la hiar kyrpang na Shillong hynne ka step, ula iashimbynta ha kane ka jingrakhe jubili ksiar bad ai jingkren ha ka cultural prokram.
Ula ong ba mynta ka sngi ka dei ka sngi ainguh ia u Blei Nongbuh Nongthaw da ki riewngeit kiba la mad ia ki jingjop ba kat une u mawmer jong ka Balang.
Ia u Myntri Rangbah la synran da ka MP ka Lok Sabha na Tura Agatha K Sangma, u Lamphang ka IIngdorbar Thaw Ain ka Jylla Thomas A Sangma, u CEM ka GHADC Albinush Marak bad kiwei ki MLA bad MDC.
U Myntri Rangbah ula ai khublei kyrpang ruh ia u Bishop bala shakri slem duh jong ka Tura, Bishop Emeritus George Mamalassary, uba dei u nongai buit ha lyndet ka jingseng ia bun bah ki skul bad ki dispensary ha kylleng ki jaka ka Ri-lum Garo mynba u dang long u Parish Priest bad hadien kum u Bishop ka Tura.
U Myntri Rangbah um shym la klet ruh ia ka synniang jong ka Tura Diocese sha ka koit ka khiah, kaba la kam khmat ha ka jingiakhun ia ka khlaw Covid, ka jingplie ia ka Pastoral Centre ha Tura ban ai jaka sah ia bun ki nongpang Covid ba kin ioh jingsumar bad ruh ban sam ia ki lad jingiarap kum ki marbam sha ki briew kiba donkam jingiarap ha ka por ba treikam ka pakhang shnong.
Ka Parish ba nyngkong eh ba la seng ha Ri-lum Garo ka dei ha Darma (mynta ha Assam), Dalu, Baghmara, Tura, Rongjeng bad Resubelpara. Mynta kila don haduh 47 tylli ki Parish hapoh ka thain.
