Shillong Risaw 30: Ka United Democratic Party (UDP) bad ka Hills State People’s Democratic Party (HSPDP) kila rai ban iatreilang kum ka kynhun synrop Regional Democratic Alliance (RDA) ban pynieng ia u kyrtong iamonlang na ka bynta ka elekshon Lok Sabha 2024.
Hynrei kine ki party kim pat rai satia ia ka kyrteng jong u Kyrtong iamonlang ne Common Candidate, tangba 3 tylli ki kyrteng kila paw ba ki kwah ban iakhun ia ka elekshon n aka kynhun kiba kynthup ia u President ka Khasi Author Society (KAS) Dr DRL Nonglait, u Nongialam barim ka HYC Bah Robertjune Kharjahrin bad MLA barim ka UDP Bah Process T Sawkmie.
U nongialam ka UDP u Dr. Jemino Mawthoh, haba iakren bad ki nongthoh khubor hynne ka sngi, ula kyntu ia kiwei pat ki seng riewlum ba kin iawan ban ia snohkti lang ha kaban lah pynmih tang ia kawei ka sur jong ka Jaitbynriew.
“Lada ki don kiwei pat ki seng riewlum kiba kwah ban iasnohktilang bad ngi, ngi long kiba kloi ban iatreilang bad ki da ka jingiatylli. Ngi thrang ban iohi ban don ia ka jingiatylli jong ka jaidbynriew bad ka jingiatylli jong baroh ki seng riewlum” ong u Bah Mawthoh.
Ula banjur ba ka UDP bad ka HSPDP, kidei ki artylli ki seng riewlum kiba la rim tam bad kidei ruh ki seng kiba don ia ka jingiatreilang kaba la slem bha bad kin iatreilang kum ka kynhun ki seng riewlum na ka bynta ka bha ka miat jong ki paidbah.
Haba kylli la kila iakren bad ka seng Voice of the People’s Party (VPP) ha kaba iadei bad u kyrtong iamonlang, u Bah Mawthoh ula pynshai ba ka seng kam pat iakren eiei bad ka VPP haduh mynta.
“Lada jia ba ngi hap ban iakren bad ki (VPP), Nga tharai kam dei ka jingthmu kaba sniew.Ngi dei ki seng riewlum kiba don ia ki juh hi ki nongrim, ka jingiohi jngai, ki jingsngewkhia kiba kumjuh bad ki mat ruh kiba kumjuh. Nga shimet hi nga sngew ba ngi dei ban long kiba ia tylli lang” ong u Bah Mawthoh.
U Bah Jemino Mawthoh, ha ka elekshon MP Lok Sabha 2019 kaba la dep ula long u Kyrtong ïamonlang jong ka kynhun Meghalaya Democratic Alliance (MDA) bad ula iakhun na ka shap jong ka seng UDP bad ula ioh ia ka jingkyrshan na baroh ki seng riewlum kynthup na ka seng National Peoples Party (NPP) kaba ialam ia ka sorkar jylla, hynrei mynta ka kynti kin ym iatreilang bad ka NPP ha ka elekshon MP Lok Sabha hynrei kila kyntu ia baroh ki seng riewlum ban iatylli lang kawei ban thaw ia ka kynhun kaba khlain jong ki seng riewlum.
Ha kawei pat ka liang naka liang jong ka seng VPP kala dep ban pynbna ban pynieng da u Dr. Ricky Syngkon ia ka elekshon MP Lok Sabha.
