Shillong, Risaw 31 : Ki Pulit ka East Khasi Hills, kila kem ia uwei u Nongialam ka seng Hynniewtrep National Youth Front (HNYF) halor ka jingkynnoh donkti ban pyniaid ia ki trok kit mar ba kit palat pud na Jingkieng Damsite da kaba lum pisa haduh T. 1500 kawei ka trok.
Une u Nongialam ka HNYF bala ngat ha ruhnar ki Pulit u dei u Bless Dkhar, President ka Hynniewtrep National Youth Front (HNYF) ka East Khasi Hills District.
Haba pynthikna ia kane ka jingjia, u Superintendent of Police (City) ka East Khasi Hills Bah Vivek Syiem ula iathuh “Ia u Bless Dkhar la kem hynne ka sngi Nyngkong da ki Pulit ka Laitumkhrah Police Station. La kem ia une u nongialam Sengbhalang na ka thain Pohkseh”.
Kat kum ka khubor, ki Pulit ka Laitumkhrah Police Station kila register da ka Suo-Moto case pyrshah ia u Bless Dkhar halor ka khubor bad ki video bala saphriang ha ki Social Media, kiba pynshisha ia ka jinglum pisa une u Nongialam Sengbhalang na ki trok kit mar, ba un iarap pyllait ba kin iaid na ka Jingkieng Damsite.
Ha kine ki khubor bad video, la iohsngew ruh ia ka jingiakren hapdeng u Bless Dkhar bad uwei u briew ba kam ialade kum u nongkhaii, ba iapynbeit halor ka jingpyniaid ia ki trok kit mar na Jingkieng Damsite.
U Bless Dkhar da kaba shai ula pan haduh T.1500 na kawei ka trok ba un pyllait ba kin iaid na Jingkieng Damsite kampher la ka dei ka trok kit khaw FCI ne kiwei kiwei ki mar.
Lah ban kdew hangne ba ka Iingkashari Meghalaya High Court kala bthah ia ka Sorkar Jylla ba ka dei ban pyrrkhing ia ka jingiaid jong ki trok kit mar na jingkieng Damsite namar ba ka jingkieng kala rim bad kam lah kyrda shuh ia ka jingkit kaba khia.
Kat kum ka hukum, ka Iingkashari kala buh ba tang ki kali kiba khia hapoh ka 10 ton ki lah ban iaid na kane ka jingkieng.
