New Delhi, Risaw 27 : Ha ka jingjia kaba pynkyndit ia ka Ri India, phra ngut ki shipai Indian Navy ha ka sngi Palei kila ngat ha ka hukum rai pyniap da ka Iingkashari ka Qatar.
Kine ki shipai barim ka Indian Navy, kiba trei bad ka kompani Al Dahra, kila shah kem ha u bnai Nailar 2022 halor ka jingkynnoh donkti ba ki dei ki riew syntiat ka India.
Hadien ka jingkem ia ki, ym shymla don satia kano kano ka jingkynnoh pyrshah ia kine ki shipai la ka dei na ki bor pyniaid ka Qatar lane ka New Delhi.
Hadien bala pynbna ia kane ka rai ha ka sngi Palei, ka Ministry of External Affairs (MEA) kala pyntip ba kala shimkhia bha ia kane ka case bad ka dang wad ia baroh ki lad ki lynti jong ka ain ban iakhun pyrshah ia kane ka hukum.
Kat kum ka jingiathuh ki briew ba tip bha shaphang kane ka kam, la ong ba ki phra ngut ki shipai Navy ki dei u Captain Saurabh Vashisht, Commander Purenendu Tiwari, Captain Birendra Kumar Verma, Commander Sugunakar Pakala, Commander Sanjeev Gupta, Commander Amit Nagpal bad Sailor Ragesh,
Ha ka kyrwoh ba pyllait da ka MEA, la ong “Ngi la ioh ia ki jingtip ba malu mala ba ka Iingkashari ka Qatar kala pynmih ia ka hukum jong kane ka case ki phra ngut ki shipai Navy ka India kiba trei bad ka Al Dahra Company”.
“Ngi kyndit ban tip ia kane ka hukum rai pyniap bad ngi dang ai ban ioh ia ka jingtip ba bniah halor kane ka hukum. Ngi la iakren bad ki bahaiing hasem lem bad ki kynhun iasaid ain, bad ngi dang wad ia ki lad ki lynti jong ka ain ban iakhun pyrshah ia ka hukum” kala ong.
