Shillong, Risaw 26: Ki samla pule North Eastern Hill University Students’ Union (NEHUSU) hynne ka sngi Palei, kila kerkut iaka jaka sah jong u Vice Chancellor (VC) ka NEHU ha U Kiang Nangbah Guest House and Auditorium bad dawa ia u VC ba un mih bad kren sha ki samla pule halor ki mat jingdawa bapher bapher.
Ha kane ka sngi ki samla pule kila pynlong shwa iaka jingiaid paidbah na Central Library haduh ka ophis treikam (Administrative Block) hynrei namar ba u VC um don ha ophis, kila iaid pat sha U Kiang Nangbah Guest House and Auditorium hadien ba kila ioh jingtip ba u don ha kane ka jaka.
Ki samla pule kila shim ia kane ka rai ban kerkut iaka jaka sah hadien ba u VC um shym la mynjur ban iakren halor ki mat dawa ba kynthup ia ki kam ha hostel, ki dawai haki jaka sumar, ka rukom ai ia ki jingbam ba bha, ban pynioh wifi, ka Library ba kyrpang na ka bynta ka School of Technology (SOT) bad ban wengkam ia u Rohit Prasad.
Hadien ba ki samla pule kim lah ap, kila tur ruh shapoh ka jaka long jingialang jong u VC kaba la iadonlang u Myntri ka Sorkar ba khmih ia ka Tnad Pule Puthi Rakkam A Sangma, kaba long hapoh U Kiang Nangbah Guest House.
Ki don ruh ki samla pule kiba la kerkut iaka jaka long jingialang bad kila don ruh kiba la rung sha kiwei ki bynta ka Guest House ban pyrta slogan ba pynrem ia u VC ka NEHU.
