Shillong, Risaw 19 : U General Secretary ka All India Congress Committee (AICC) ba khmih ia ka Meghalaya, u Manish Chatrath, ha ka sngi Palei ula kam ba bun bah ki Nongialam hapoh ka Ri, kiba la phet na ka seng Congress, kila kwah ban wanphai pat sha ka party.
“Kam dei tang kaba jia ha Karnataka hynrei ka dei ha baroh kawei ka Ri. Ki Nongialam hapoh ka Ri, kiba la ieh ia ngi, kim shym la sngewtynnad satia ha kiwei ki party bad kila kwah wanphai pat. Katto katne ngut ki dei kiba nga ithuh bha. Kila phone ia nga bad lehse kila phone ia kiwei ki nongialam ruh…..haba ki briew ki iohi ba phi la sdang ban jop biang, kin kwah ban wan phai biang” ong u Chatrath haba iakren bad ki nongthoh khubor.
Haba kylli halor u Myntri Rangbah barim ka Jylla Dr Mukul Sangma bad kiwei ki Nongialam na Meghalaya kiba la phet na ka Congress, u Chatrath ula ong “Haba phai hi sha ka Jylla, u President ka MPCC u dei uba biang eh ban jubab ia kane ka jingkylli”.
“Kin don beit kiba la iakren. Ngam kwah jer kyrteng iano iano ruh hynrei haba ki jingtyrwa ki wan sha u President ka PCC, u ban sap hah sha ka AICC, ka party kan sa shim ia ka rai” ula bynrap.
