Shillong, Risaw 16: Ka Myntri ka tnat ka koit ka khiah ka Kong Ampareen Lyngdoh hynne ka sngi kala leit jurip iaka Wellness Centre kaba don ha Nongmynsong.
Ia ka Myntri la synran lang da u MDC u bah Fantin J Lakadong, DHS Dr. R. Ally, DM&HO Dr. Shakina Lyngdoh bad ki dkhot ka executive dorbar shnong, ki ASHA bad kiwei kiwei de.
Ha ka jingleit jurip, la paw shai ba kala i donkam ban kyntiew ia kane ka Wellness Center kaba donkam palat naka bynta ki paidbah nongshongshnong bad kiwei ki shnong marjan ban ai jingsumar.
Haba kren ha kane ka sngi, ka Kong Ampareen kala ong ba naduh ki snem bala dep, kum ha kiwei ki thain ka nongbah Shillong, kala donkam ban iathir sani bha haba iadei bad ka jingkyrni drok kaba la sdang pur sa sha kiwei ki bynta ka sor.
Kala ong ba ha Nongmynsong ruh kala donkam ban pyrkhing bad ban iathir sani iaki lad lynti ban tehlakam iaka jingkyrni drok bad kiwei kiwei ki kam bymman kiba mih namar u drok.
Nalor kane ka Myntri kala pynpaw baka Wellness Center ka dei kaba biang ha ka jingdon ki nongtrei ba kynthup ia ki doctor kiba hap trei lang ha Rynjah ban shakri iaki paidbah ka thain.
Kala donkam ban pynbun iaka jingai tika iaki khynnah khamtam kito kiba khlem ioh ka tika haka por ka khlam COVID-19.
La shim rai ban pynbun iaka jingai tika naka 57% kaba dei ka ba mynta bad la bthah iaka Wellness Center ban sumar ruh ia kiwei ki jingpang kiba iabit.
Nalor kane la shim ruh iaka rai ban iakren ruh halor ka jingpang Tuberculosis daka ba pynlong ki jingpynsnhewthuh paidbah namar mynta la lah ban sumar ia kane ka jingpang.
