Shillong, Risaw 15 : Haduh 22 ngut ki stad ki jhad na ki 13 tylli ki Ri ka Pyrthei, kila wan sha Meghalaya ban hiar jurip ia ka rukom thung diengjri bad pynmih symbai ha ka jaka ba 40 acre, kaba don ha Umtru, Eastern West Khasi Hills District.
Kine ki stad ki jhad ki dei kiba wan na Cambodia, Malaysia, Indonesia, Papua New Guinea, Thailand bad Cote D’Ivoire. Kine ki briew kila poi myn ha ka sngi Thohdieng bad la pdiang ia ki da ki nong Meghalaya bad Assam.
Kane ka kynhun kala pynlong ruh ia ka jingialang hapoh ka auditorium ba shipir hajan kane ka jaka pynmih symbai diengjri ha Umtru. Ia kane ka jingialang la pyniaid da u M vasanthageson, Assistant Director ka Omega Green Solution.
Ka Sorkar Pdeng kala pyllait ia ki skhim bapher bapher kiba kynthup iaki subsidy, ban pynshlur ia ki nongrep ba kin pynmih diengjri ha baroh ki Jylla ka Thain Shatei Lam Mihngi kynthup ka Meghalaya bad Assam.
Kane ka jingwanrah ia kine ki skhim thung diengjri ka dei kaba la leh da ka jingthmu ban lah pynkhlain ia ka jingpynmih jri hapoh ka Ri khnang ba kan nym ap shuh ia kiwei ki ri ban pyndap ia ka jingdonkam jri hapoh ka Ri.
Ka Omega Green Solution kala buh ruh ia kawei ka Rubber Nursery ha ka thain Jirang, kaba hap hapoh ka East West Khasi Hills District ka Meghalaya, kaa don ha khappud ka Kamrup District.
Kane ka kompani kala aikam aijam ia ki samla na ka thain Shatei Lam Mihngi da ka jingseng ia kane ka jaka pynmih symbai diengjri.
