Shillong, Risaw 15: U Myntri ka koit ka khiah ka Sorkar Pdeng u Dr. Mansukh L. Mandaviya hynne ka sngi U Blei, ula leit ban jurip ha kylleng ki jaka jong ka jylla bad ula leit jngoh kyrpang ia ka Ri Bhoi District, kaba la ioh jingithuh kum ka Aspirational District.
Ha katei ka jingleit jurip u Myntri ka Sorkar Pdeng la iadonlang ka Myntri ka koit ka khiah ka jylla Dr. Ampareen Lyngdoh, u Deputy Commissioner jong ka Ri Bhoi, u Arpit Upadhayaya, u Superintendent of Police ka Ri Bhoi u Giri Prasad, MD jongka NHM u Ramkumar S bad ki ophisar na ki tnat bapher.
La sdang ia kane ka jingleit jurip da kaba leit jngoh ia ka Health & Wellness Centre ha Umsaw Nongkharai, ha kaba u Myntri ka Sorkar Pdeng ula iakren bad ki nongtrei ASHA bad kiba don ia ka Smart Card ban lum jingtip halor ki jingmyntoi ba ki ioh haka por ba ki pang ki shitom lyngba ka Smart Card.
Hadien kane, la pynlong ia ka jingialang ha kaba la khmih t bniah halor ka prokram Aspirational District ha ka Conference Hall jong ka ophis Deputy Commissioner ha Nongpoh.
Ka Dr Ampareen Lyngdoh kala batai ia ka jingthmu jong ka jingwan u Myntri ka Sorkar Pdeng ha ka jingialang bad kala iathuh ba ula plie ia ka Regional Cancer Centre bad kiwei ki lad ai jingshakri ha NEIGRIHMS Hospital.
Kala ban jur ba ka jingphaikhmat jong u Myntri Sorkar Pdeng ka long halor ka jingkongsan jong ka jingkylla na ka Aspirational District sha ka Inspirational District ban weng ia ka jingduk bad ka jingkyntiew ia ka roi ka par kaba pura na ka bynta ka bha ka miat jong ki briew jong ka jylla bad ka ri hi baroh kawei.
U Mission Director ka NHM u Ramkumar S, ula pyntip ia u Myntri Sorkar Pdeng shaphang ki lad ai jingsumar ba don ha Umsaw Nongkharai Sub-Centre bad ula ai ka jingbatai shaphang ki ki kor ki bor (Digital) kiba la pyntreikam ha ka jylla na ka bynta ban kyntiew ia ki jingkyntiew jingtip ne Data Entry.
Ula pyntip ruh ia u Myntri ka Sorkar Pdeng, halor ka jingjop jong ka jylla ha ka jingpynmih ia ka bording na ka sngi ne solar energy ban pynbiang ia ka bording ha ki jaka ai jingsumar.
U Myntri Sorkar Pdeng Dr. Mansukh L. Mandaviya yn leit jngoh ia ki jylla kiba don ha ka thain shatei lammihngi kaba kynthup ia ka Nagaland, Meghalaya bad Assam ban peit bniah ia ka jingiaid shaphrang ki prokram kiba la bei tyngka da ka sorkar pdeng bad ban plie ia ki lad jingshakri bapher ban kyntiew ia ka jingai jingsumar ha ka thaiñ.
