Guwahati, Risaw 15 : Ka North East Indigenous People’s Forum (NEIPF) kala rai ban phah dorkhas sha ka Committee ba lai ngut ki Dkhot, ba lah thung da ka Iingkashari Supreme Court ban tohkit ia ka thma iapher Jaidbynriew ha Manipur.
Kane ka rai kala mih na ka jingialang Executive Committee ka NEIPF bala pynlong da ka Arunachal Pradesh Chapter, kaa longha Hotel Benjamin, Papu Nallah, Itanagar ha ka sngi Balang jong ka taiew bala lah.
Ha ka 7 tarik Nailar, ka Iingkashari Supreme Court kala thung ia ka Committee ki lai ngut ki dkhot ba kynthup ia ka Judge jong ka Women High Court bad 42 ngut ki Special Investigation Team, ba kan tohkit ia ki kam umsnam ha Manipur bad ban wanrah pat ia ka jingngeit bad jingshaniah ki paidbah ia ka Ain.
Ia kane ka Committee la khlieh da ka Judge barim ka Jammu and Kashmir Chief Justice Gita Mittam bad ki kynthup ruh ia ki Judge barim ka Bombay High Court Justice Shalini Phansalkar Joshi bad Judge barim ka Delhi High Court Justice Asha Menon.
Kane ka jingialang jong ka NEIPF kala pynpaw ia ka jingsngewkhia kaba jur halor ka jinglong jingman ha Manipur hadien ka jingkhie ka thma iapher jaidbynriew hapdeng ki Kuki bad ki Meitei naduh ka 3 tarik Jymmang, kaba la shim ia palat 150 ngut ki mynsiem briew bad bun phew hajar kiba khlem iing khlem sem.
“Ka jingialang kala iakren sani bha halor ka jinglong jingman ha Manipur bad pynpaw ia ka jingsngewkhia halor ka jingiaid ka kam rep ia ki jingthung ba buh jingma kynthup ia u poppy ha ka thain Shatei Lam Mihngi” ong u Bah Wellbirth Rani, Chairman ka NEIPF.
Ka jingialang kala iakren ruh ia shibun ki ishu kiba iadei bad ki paid riewlum jong ka thain Shatei Lam Mihngi.
Haba pyntreikam ia ka mat pdeng jong ka ‘World Indigenous Day’ ka jingialang kala rai ruh ban pynbun ia ki prokram jong ki samla ha ka thain ka ban pynleit jingmut halor “ki samla riewlum kum ki nongwanrah ia ka jingkylla”.
Haba pynsngew ia ka jingsngewkhia halor ka jingpynjot ia ka mei mariang ha ka thain, u Bah Wellbirth ula ong ba ka NEIPF kala kyrpad ia baroh ki paid riewlum ba kin pynthikna ha kaban sumar bad pynneh pynsah ia la ki jong ki tynrai.
