Shillong, Risaw 13 : Ki 27 ngut ki nong Meghalaya kynthup u MP ka Rajya Sabha Dr WR Kharlukhi, kila wan poi suk ha Delhi mynta ka sngi.
Kine ki Nong Meghalaya kiba leit pilgrim sha Jerusalem, Bethlehem, kila wan da ka liengsuin na Cairo, Egypt kaba la hiar hynne ka step hapoh ka Kad Liengsuin ha Delhi.
Kine ki Nong Meghalaya kila sahkut ha ka jinghiar thma kynsan kynsan ka Hamas ia ka Israel myn ha ka 7 tarik Risaw, kaba la klang mynta sha ka thma hapdeng ka Israel bad ki Hamas ha Gaza.
Ka jingshimkhia jong ka Sorkar Jylla ban iakren bad ka Ministry of External Affairs (MEA) ka Sorkar Pdeng, kala pynthikna ia ka jingshngain bad jingwan phai suk jong kine ki nongshongshnong ka Jylla shala ka jong ka Ri.
Ka Indian Embassy ha Ramallah bad ka Embassy ha Cairo, kila shimkhia ia ka jingshngain jong kine ki 27 ngut naduh ka sngi ba pynmih ia ki na Israel haduh da jam ia u pud sha Egypt kat haduh ban da poi ha Cairo.
U Myntri Rangbah ka Jylla Conrad K Sangma ula pyntip lyngba ka X (twitter) ba ula shimkhia bha ban iakren bad ka MEA ban pynthikna ia ka jingshngain jong ki nongshongshnong ka Jylla kiba sahkut ha Israel.
“Ngi sngew heh mynsiem ban tip ba ki Ophisar ha kitei ki Ri kila pynthikna ia ka jingrung jong ki (nong Meghalaya) sha Egypt, bad pynthikna ia ka bha ka miat jong ki nongshongshnong jong ngi. Ka jingpyrkhat bad ka jingduwai kan dang iai bteng bad ki katba ki dang don ha lynti tad haduh ba kin da poi shala iing” ula ong ha ka Twitter tang shisngi hadien ba khie ka thma.
Ki video bala ioh lum ha ka step sngi Thohdieng ka pyni shai ba kine ki 27 ngut kynthup u MP ka Rajya Sabha bad ka Iing ka sem jong u, kila poi suk ha Delhi Aiport. La iohi ruh ia ka jingiakdup bad iadoh ieid hapdeng jong ki da ka jingkmen namar ka jingpoi suk shala ka jong ka Ri.
Kat kum ka khubor, u MP ka Jylla un sa wan poi sha Shillong ha ka 16 tarik Risaw.
