Shillong Risaw 11: Ka Meghalaya State Disaster Management Authority kan pynlong ia ka State Level Mock Exercise ha ka 12 tarik u Risaw naduh ka por 9 baje mynstep ha baroh ki District jong ka jylla Meghalaya.
Kane ka Mock Exercise kan iasyriem kum ka jingwan lynshop u jumai ba jur ia ka jylla ha u snem 1897 ha kaba yn iashimbynta da ki bor pyniaid District, ki shipai, ki pulit, NDRF, SDRF, Fire and Emergency Services, Hospitals, skul, college, ki kynhun sengbhalang, ki nongialam shnong, ki dkhot jongka Bharat Scouts and Guides, Indian Red Cross Society, NSS, Aapda Mitra Volunteers bad kiwei kiwei.
Ki dkhot jongka National Disaster Management Authority kin wan ban donlangban peit bad khmih iaka jingpynlong ia kane ka Mock Exercise da ka jylla bad ki District.
Namar kane ka Mock Exercise ha kaba ki kynhun bapher bad ki kali Ambulance kin wan iashimbynta, kumta ka State Disaster Management Authority kala kyntu ia ki paidbah ba kim dei ban syier ne sheptieng hynrei ban ai ka jingiatreilang bad ki jingpynkhreh jong ka sorkar bad ba kin pyrkhat lypa iaka leit ka wan ka jongki ban lait na ka jingdheng kali.
Ha Shillong ban sdang ia katei ka Drill, kan don ka jingpynsawa ia ka siren da u Deputy Controller, Shillong kaban pyni ba ka don ka jingkyiuh u jumai bad ka jak ban pynlong iaka Mock Exercise kadei ka Polo, ka surok na Polo sha Wahingdoh, Polo Super Market, ki dukan kiba don ha kylleng ka thain Polo, Hotel Polo Towers, SBI building, Polo bad MeCEL, Lumjingshai, Samkhamti Petrol Pump, Urkaliar, Female Health Worker, School of Nursing and School of Nursing, TTC, Ganesh Das Government Hospital, Lawmali, St. Xavier’s School, Polo Pynthorumkhrah Golflink Secondary School bad Shillong Secondary School, Forest Colony.
Ia ka Incident Command Post, Medical Camp, Staging area, Relief Camp bad iaka Base Camp yn buh ha ka SRGT Parking Lot bad ka jaka kaba thylli ha ka madan 3rd Ground Polo.
