Imphal, Risaw 11 : Ka Sorkar Manipur kala pynjari da ka korphi ba khlem pud hapoh sor Moreh haba pynmih ia ka hukum ba pyrshah jur ia ka jingleit rung sha ki nongkynti jong ki briew ba phetwir hadien ba mih ka jingpyrshang ban leit pynpra phom ia ki Iingsah jong ki paid Meitei.
U District Magistrate ka Tengnoupal ula weng noh mar mar ia ka jingpynjynsur jong ka korphiw na Moreh naduh ka sngi Nyngkong.
Ka hukum kala ong ba sha kiwei pat ki bynta jong ka District, ka jingpynjynsur ia ka korphiw naduh 6 baje mynstep haduh 5 baje janmiet kan dang iai bteng beit kumba la pynbna.
Ha ka sngi Ba-ar, ka Tnad kam pohiing ka Jylla kala pynmih ia ka hukum ba iai ban ia ka hukum bala pynmih da ka Iingkashari Supreme Court myn ha ak 25 tarik Nailur, kaba iadei bad ka jingleit tung tuh sha ki nongkynti jong kiwei pat.
Ha ka hukum bala pynmih da ka Tnad, ka Sorkar Manipur kala ong ba kane ka Iingkashari ba hakhlieh duh kala bthah ruh ia ka Sorkar Jylla ban pynthikna ha kaban ai jingiada ia ki nongkynti jong ki briew ba kyla phetwir bad ruh ia ki nongkynti kiba la shah pynpra/wiang ding ha kane ka thma iapher jaidbynriew.
Lada jia ba don ka jingleit rung tuh sha ki nongkynti kiwei, la bthah ia ki nongleit rung tuh ba kin kynran dien lem kumta ki briew ba donkti kin ngat ha ka contempt of court halor ka jingbym burom ia ka hukum ka Iingkashari.
