Shillong, Risaw 10 : U Symbud Myntri Rangbah ka Jylla ba khmih ia ka Tnad Transport Bah Sniawbhalang Dhar ha ka sngi Ba-ar, ula ong ba ka Sorkar kam don jingmut satia ban pynsangeh noh ia ka jingpynpoi lynti rel ha Ri-lum Khasi-Jaintia.
Haba iakren bad ki nongthoh khubor, u Bah Sniawbha ula ong “Ngim pat pynsangeh satia ia kane ka jingthmu. Ngi dang shong bisahr ia ka”.
Ka project lynti rel ha Ri-lum Khasi-Jaintia kala mad ia u diengpyngkiang namar ka jingtynjuh pyrshah jong ki kynhun bapher bapher kynthup ki Sengbhalang. Kane ka project ka kynthup ia ka lynti rel Tetelia-Byrnihat ba 22 Km bad ka Byrnihat-Shillong ba 108 Km.
Namar kane, ka Sorkar Jylla kala rai ban wad ia ki lad ki lynti ha kaban pyniasoh lynti rel noh ha East Jaintia Hills District hynrei ia kane ruh la pyrshah jur da ki paidbah.
U Bah Sniawbha u pyntip ba ka Sorkar haduh mynta kam pat shim rai satia la kan pyniaid beit shakhmat ia ka project lynti rel.
“Kane ka wan jia namar ngi donkam ban iakren shuwa bad baroh ki kynhun bapher bapher bad dei tang hadien kane ba ngin sa lah ban shim rai” ula ong.
Ula ong ba ka jingpyrshah ia kum kine ki project kin don beit. Ula pyntip “Hynrei ka dei ka kamram jong ka Sorkar Jylla ban pynshai (halor ka jingkongsan ka lynti rel ia ka Jylla). Namar kata, ki Deputy Commissioner kila pynlong ia ki jingialang pynsngewthuh paidbah na ka por sha ka por”.
“Ngin dang bteng ban iakren bad ki (kynhun bapher bapher). Lada ki ong em, ngin hap ban pynsangeh noh ia ka” ula bynrap.
