Shillong, Risaw 04 : Ka National Symposium kaba Ar sngi halor ka mat “Strategies for promotion of incubatee in Agriculture and Allied Sectors in the Northeastern Region of India” la plie hynne ka sngi Balang da u Dr. Ch. Srinivasa Rao, Director, ICAR-National Academy of Agricultural Research Management, Hyderabad.
Ia kane ka national symposium la pynlong da ka Agri-Bussiness Incubation Centre jong ka ICAR Research Complex na ka bynta ka thaiñ shatei lam mihngi ka ri.
Haba kren ha ka jingialang u Dr Ch Srinivasa Rao ula ong ba kane ka jingialang kaba ar sngi kan iarap ha kaban lum lang ia baroh kiba donbynta naduh ki Nongwad Bniah, ki nongthaw polisi, Incubator, agripreneurs, startups, ki karkhana kiba iadei bad ka rep ka riang, ki nongbei tyngka, ki kompani, ki samla pule bad kiwei kiwei na kylleng ka ri ba kin iadonlang bad ban sam ia ki jingtip ia ki kam kiba kila sdang thymmai, ki jingpynsngew, ki sjingshemphang ha ka kam khaii pateng ha kaba iadei bad ka rep ka riang.
Ula banjur ba ki nongrep kiba dang samla jong kane ka juk kaba mynta kim dei ban long ki nongwadkam hynrei kidei ban long ki nongaikam ia kiwei pat bad ka ong, ba ka por kala dei mynta ban ioh synshar iaka iew ka hat ha kylleng ka pyrthei. Halor kane ka bynta, u kyrmen skhem ba ka thaiñ shatei lam mihngi ka don iaka kabu kaba biang bha namar ka jingdon ia ki mar kiba khampher bad phyla na kiwei pat.
Haba batai shaphang ka jingtreikam jong ka Institute, u Dr. V.K. Mishra, Director jong ka ICAR-RC-NEH, Umiam ula ong ba kane ka jingialang kan iarap ha kaban ai iaki jingbatai kiba bniah ia baroh kiba don bynta, ki karkhana bad ki nongbei tyngka halor ki lad ki lynti ban kyntiew iaka rep ka riang ha ka jylla, ka lad ban khaïï bad ki bynta kiba lah ban bei tyngka. Kan long ruh ka rynsan ia ki kynhun ka ri ha ka bam ka dih, ka rep ka riang, ka kam ri jingri, ki syntiew ki skud, ka kam khaïï hak arep ka riang bad ka jingkyntiew iaka thaiñ nongkyndong da kaba pyniasoh bad iatreilang ban thaw ia ki olisi treikam.
Haba batai shaphang ka Agri-Business Incubation Centre, u Dr. B.P. Singh, Head Division of Technology Assessment and Capacity Building (DTAC), ula ong ba u Myntri Rangbahduh ka ri, u kwah ba ki trai shnong kin mih shakhamt bad ba kin pyniaid iew iaki mar jong ha kylleng ka pyrthei bad ka kam khaïï pateng ha ka rep ka riang ka don ia ka bynta kaba khraw bha ban kyntiew iaka ioh ka kot jong ki nongrep bad ia ka ri baroh kawei.
U Dr. A.K.Mohanty, Director, ATARI, Umiam ula ong, ba ki nongrep kidei ban don ia ka jingmut jingpyrkhat kum ki nongkhaïï ha kane ka juk kaba mynta bad ula pynpaw ba dei ban pynlong ia ka jingwad bniah ha kata ka lynti katkum ka jingdonkam jong ki karkhana.
Katba u Dr. G. Kadirvel, Director, ATARI Guwahati, ula ong ba jinglut jingsep haka jingpynmih bad ka jingdawa ha ki iew ki hat kadei ban buh jingmut bha ha ka jingpynkhreh ia kano kano ka projek.
Ula banjur ba ka jingpynmih ia ki buit thymmai haka rep ka riangka long kaba duna bha haba ianujor bad kiwei pat ki liang, kumta donkam ban phaikhmat bha ha ka jingpynpawnam ia ki mar, ka rukom song bad ka rukom kyntiew khnang ba kan lam sha ka jingseisoh.
U Dr. Ch. Srinivasa Rao, ula pyllait paidbah iaka kot sah kynmaw bad ula plie ruh iaka jingpyninam ia kaba la iashimbynta da ki nongpyniaid ia ki mar na kylleng ki jylla.
