Shillong, Risaw 04 : Ka Iingkashari Meghalaya High Court ha ka sngi Balang, kala bthah ba u dewiong bala tih be-ain um dei ban poi sha ki karkhana dewbilat lane karkhana coke kiba don hapoh ka Jylla.
Kane ka hukum kala mih na ka Iingkashari full bench bala khlieh da u Chief Justice Sanjib Banerjee haba shong bishar ia ka PIL halor kane ka kam.
Nalor ka kaiphod bala aiti da ka Jylla, u Advocate General ula pyntip ba ka Jylla kala ioh ia ki jingtip ba bniah bad don ruh ki jingtip kiba dang ap kiba iadei bad ka jingdon u dewiong ba la pyndonkam da ki karkhaan ferro alloy, dewbilat bad ki coke.
U AG ula pyntip ruh ba haba shimkhia ia ki jingshem jong u Justice Katakey bala kdew ha kawei na ki kaiphod ba ula ai, ka Sorkar kala ai show cause sha ki katto katne ki karkhana dewbilat hapoh ka Jylla.
Ka Iingkashari kala buh ban shong bishar biang ia kane ka kam hadien hynriew taiew haba bthah ruh ba u Justice Katakey u dei ban ioh noh ia ka jingsiew adhoc ba T. 4 lak nalor kiwei kiwei ki jingpynlut halor ki kam b aula leh kat kum ki jingbthah bala ai kham hashuwa.
Ha kajuh ka por, ka Iingkashari kala bthah ia ka Sorkar ba kan khmih halor ka jingkynnoh kaba mih pyrshah ia ka Jai Maa Coal Private Limited bad ki kynhun ne briew ba khmih ia ka, kaba la ujor lyngba ka PIL.
