Khliehriat, Risaw 04 : Ka Khasi Students’ Union (KSU) –East Jaintia Hills, kala pynpaw ia ka jingsngew bynniaw halor ka jingbym wan iasnohkti lang jong ki Nongniah kali ha ka jingiakhih halor ka jingsniew palat ka surok NH-6 bad pynpaw “Imat ki sngewtynnad ban iaid ha ka surok kaba jot rathai”.
Kane ka jingkynthoh ka KSU kala mih halor ka jingbym burom ki nongniah kali ia ka jingkyrpad ka seng ban nym sei kali ne niah ha surok naduh ka miet 25 tarik Nailur por 7 baje haduh ka por 5 baje mynstep, ban pynpaw ia ka jingpyrshah halor ka jingleh bym suidniew ka National Highway Authority of India (NHAI) ban maramor ia kane ka surok bah.
Lah ban kdew ba ha ka 25 tarik Nailur, ki paidbah ka East Jaintia Hills hapoh ka jinglamkhmat ka KSU, kila pynlong jaka thungkba, khwai dohkha bad thiah kai sngi ha surok NH-6 ban pyni sha ki bor khmih ia ka jingbym lah shah shuh ia ka jingleh bym patiaw jong ka NHAI ban maramot ia ka surok kaba la jot palat liam.
“Ka Seng KSU-EJH ka sngewkhia jur halor ka jingbym iasnohkti lang ki nongniah kali kibaju iaid lyngba ka NH-6, ki bym burom ia ka jingkyrpad ka seng ban sangeh iaid kali ha ka por mynmiet haduh 5 baje mynstep. Kane ka jingbym iasnohkti ka pyni ba imat ki sngewtynnad beit ban iaid ha ka surok kaba la kot rathai” ong u Nongialam ka KSU.
Haba iakren bad u General Secretary ka KSU-EJH Bah K.S Suchiang ula ong “Ki don tang shipawa ki nongniah kali kiba iasnohkti lang bad ka Seng hynrei kiba bun kim treh satia” bad bynrap “Ka seng kala shim ia kane ka sienjam ( ban iakhih) namar ka kwah ba ki paidbah kin suk bad aram ha ka leit ka wan hynrei dang don kiba kmen ban iaid ha ka surok ba jot”.
Ula ong ba kane ka jingkyrpad ka seng ban nym iaid kali ha ka por mynmiet kala kut noh ha ka 2 tarik Risaw por 5 aje mynstep, kaba la dap shitaiew kynthih.
Haba kylli, une u Nongialam ka KSU ula ong ba ka Seng kan sa shong pyrkhat biang halor ka jinglong jingman kaneka surok hynrei ka kwah ia ki paidbah khamtam ki nongniah kali ba kin ai mynsiem lem da kaba iasnohkti khnang ba ka jingdawa ban maramot noh ia kane ka surok kan long kaba seisoh.
Pule lang ia kane: Sikkim: Jah rngai 20 ngut ki riew paidbah bad 23 ki shipai na Rangpo, julor 150 tylli ki Iing
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
