Shillong, Nailur 29 : Ka Sorkar Jylla ka lah ban khot ha ka taiew ban wan ia ka Harijan Panchayat Committee (HPC) haba iadei bad ka blueprint bala pynkhreh da ka Sorkar ha kaban pynkynriah noh ia ki 342 tylli ki Longiing na Them Metor, Them Iew Mawlong.
U Symbud Myntri Rangbah ba khmih ia ka tnad Pynroi Sor Bah Sniawbhalang Dhar ula pyntip sha ki nongthoh khubor hynne ka sngi Thohdieng ba ka jingpynkhreh ban pynkynriah noh ia ki Longiing kala poi ha ka khep ba khatduh namar ia ka blueprint la dep ban pynkhreh.
Haba kylli halor ka jingkyrpad ka HPC ban ai jaka shuh shuh na ka blueprint ka Sorkar, u Bah Sniawbha ula ong ba kum kine ki jingdawa kim dei satia shibynta jong ka lynti ban pynbeit. Ula bynrap ba lada mih kino kino ki jingkylla hadien ka jingiakre, ka Sorkar kan sa shong bishar ia ki.
Halor ka hukum ka Iingkashari ba pynpaw ia ka jingsngewkhia halor ka jingslem ban pynbeit ia ka kam Them Metor, u Bah Sniawbha ula kular ba ka Sorkar kala pyrshang kat kaba lah ban pynbeit noh ia kane ka kam hashuwa ban kut une u snem.
