Guwahati, Nailur 29 : Ha ka jingiakhun pyrshah ia u droks, ki Pulit ka Assam kila ioh ban kem ia lai ngut ki samla na Cachar halor ka jingkynnoh ba ki donkti ban khaii droks heroin.
Kat kum ka khubor Pulit, une u droks u dei uba wan poi na ka Jylla ba marjan bad u dei uba thmu ban pynpoi sha Maharashtra.
Ki Pulit kila ioh kurup haduh 88 tylli ki synduk sabon kiba thep ia u droks heroin ba khia haduh 1.15 kilo.
“Halor ki jingtip kiba bniah, ngi la pynlong ia ka jingkhynra ha Kabuganj, Sonai. Ha kane ka jingkhynra, ngi la ioh bat ia kawei ka kali kaba wan na ka Jylla ba marjan bad ioh kurup ia u droks bala buhrieh ha kane ka kali” ongu Subrata Sen, Additional SP ka Cachar.
Ula ong “Ngi la kem ia kine ki laingut ki nongkhaii droks na kane ka kali bad ha ka jingtohkit, ngi la shem ba ki dei ki nong shongshnong ka Cachar District”.
Kine ki dei ki nongshongshnong ka Bhaga Bazar bad North Hawaithan kaba hap hapoh ka Dholai Police Station, kaba don marjan ka khappud Assam-Mizoram.
