Shillong, Nailur 28 : Ka Iingkashari Meghalaya High Court ha ka sngi Palei, kala bthah ia ka National Highway Authority of India (NHAI) ba kan maramot ia ka surok National Highway-6 ba kan long iaid ki kali.
“Ka Iingkashari kam kwah ban tip ia ki shithi bala ia ai hapdeng ki heh ka NHAI lane ka jingbthah da ka jingthoh bala ai sha u Contractor; hynrei kaei kaba kongsan ka long ba lano ka kam kan sdang bad lano ba kan dep khnang ba ki kali kin lah ban iaid” ong ka Division Bench ba kynthup ia u Chief Justice Sanjib Banerjee bad Justice B Bhattacharjee ha ka hukum haba shong bishar ia ka PIL.
Ha ka affidavit bala file da ka NHAI ha ka 27 tarik Nailur, la pynpaw ba u Regional Officer ka NHAI ba shong ophis ha Guwahati ula leit ban iuhkjat ha kane ka surok myn ha ka 16 tarik Nailur.
Ia ki jingbthah jong une u Regional Officer la buh jingthoh ha ka kaiphod leit jurip ba 16 tarik Nailur. La ong ba kala don ka jing bthah bala pynmih ha ka 19 tarik Nailur ia uwei na ki contractor bad u Project Director ka NHAP ba kin shim noh mardor ia ki sienjam ban pynlong ia ka surok NH-6 na Jowai sha Ratacherra kaba long bad ibit ban iaid ki kali.
Ha kajuh ka por, ka Iingkashari kala bthah ia u nongmudui bad ia ka NHAI ba kin pynpaw ia ki kam bala pyntrei haduh mynta.
Kala bthah ruh ia u Deputy Commissioner ka East Jaintia Hills ban thoh ia ka kaiphod ba haduh katno ka jingtrei kala iaid ha sor Khliehriah bad palat ia ka Khliehriat haduh ha Lumshnong.
Ka Iingkashari kala buh ban shong bishar biang ia kane ka kam ha ka 5 tarik u Risaw.
Pule lang ia kane: Sngewkhia u CEM ba wan pynthut ki nong Assam ia ka skhim JJM ha Barapathar
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
