Shillong, Nailur 26 : Uwei u Rangbah la suba ba ula pynkut noh iala ka jong ka jingim ha u tyllai phasi hadien ka jingjah rngai nala iing bad ka jingkynnoh ba u donkti ban thombor ia kawei ka samla skul.
Une u briew u kyrteng u Kmanwell Marwein ba na Lawbyrtun, Eastern West Khasi Hills District. Ia ka metiap jong une u briew la lap hi da ka hynmen bad u pyrsa na kawei ka nala jaka rep hapoh ka thain.
Kat kum ki khubor Pulit, une u briew u dei uba la suba donkti ha ka jingthombor ia kawei ka samla lud ba 19 snem ka rta, kaba la jia ha ka 19 tarik Nailur.
La iathuh ba kane ka samla kala mynsaw jur bha ha kane ka jingshah thombor ha une u briew uba la tied da u maw bad dung ruh da ka tari. Ia kane ka samla la pynkit sha Shillong Civil Hospital ban ioh ia ka jingsumar.
Ki Pulit ki iathuh ba une u briew ula jah rngai ialade naduh ka 19 tarik Nailur, kaba pynsuba jur ba u donkti ban leh ia kane ka kam bymman.
Hynrei dei hynne ka step, la lap noh ia ka metiap jong une u briew kaba thiah lyngktar ha kawei ka nala jong ka jaka rep kaba don marjan ka Shnong.
Ki Pulit ki suba jur ba une u briew ula sdien phasi hi ialade da ka jinglap ia u tyllai jyrmi bala dkut halor uwei u dieng, uba don markhap bad kane ka nala.
Ki Pulit kila pynkit noh ia kane ka metiap sha Hospital ban pyndep ia ka post mortem. Ka jingtohkit mynta ka dang iaid shakhmat ban pynthikna ia ki daw jong ka jingiap.
Pule lang ia kane: Ioh wanphai Iing ki Nongialehkai Wushu ka Arunachal Pradesh hadien ka jingkyntait ai Visa ka China
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
