Shillong, Nailur 22 : U MLA ka Voice of the People Party (VPP) na Nongkren Bah Ardent M Basaiawmoit ha ka sngi Thohdieng, ula dawa ia ka Sorkar Jylla ban leh eiei pyrshah ia ki kam dawa pisa ba bun jait bun rukom kaba lam sha ka jingkiew dor ki mar ki mata hapoh ka Jylla.
Haba wanrah ia ka jingkylli bynrap hapoh ka Iingdorbar, u Bah Ardent ula ong ba ka jingkiew dor ki mar ki mata ka dei ka kam kaba sngewkhia bha bad kaba la ktah jur bha ia ki riew paidbah paidlang.
“Jan man ka taiew, kan don ka jingkiew dor (ki mar ki mata) bad ka daw hi jong kane ka jingkiew dor ka dei namar bala bun palat ki jingdawa pisa kiba la jia hapoh ka Jylla. Kumta kine ki Nongkhaii khnang ba kin khyllie iakaba duh, kila hap ban pynkiew dor ia ka mar ka mata” ula ong.
Haba jubab, u Myntri ka Tnad Food & Civil Supply Affairs Comingone Ymbon ula ong ba ka kam ba iadei bad ka jingkiew dor kam shym la jia tang ha ka Jylla hynrei ka dei kaba la mad ha baroh kawei ka Ri India.
Kat kum ka jingong jong u, ka jingduna ka jingpynmih marbam, ka jingkiew dor ka umphniang, ka jingkylla ka suinbneng, ka jingioh duna slap bad kiwei kiwei ki daw, kila synniang sha ka jingkiew dor.
Ula pyntip ba ka Jylla kala don ia ka Vigilant Committee ban peitngor ia ka jingkiew dor bad ta ka daw ka Tnad kala kala khmih ia baroh lai tylli ki Iew-ka Iewduh, Laitumkhrah bad Rynjah da kaba pyndonkam ia ka mobile app bad GPS halor ki mar bam mardih.
Halor ka jingsngewkhia bala pynsngew da u MLA ka UDP na Sohiong Bah S Lyngdoh ba iadei bad ka jingkynnoh ioh khaw plastic, u Bah Coming ula ong ba ki paidbah ka Jylla kim pat tip bha shaphang u fortified rise (khaw ba khleh vitamin) bad kila pynman ba u dei u khaw plastic.
“Hynrei, lada ki briew ki ioh khaw plastic, kyntu ia ki ba kin ujor sha ka Tnad jong ngi” ula bynrap.
Shuwa kane, u Myntri ula pyntip ba la Sorkar kala shim ia ka sienjam ban tehlakam ia ka jingkiew dor ki marbam mardih.
Ka Tnad kala bthah ia baroh ki District/Sub-Division ba kin leit khynra na ka por sha ka por bad leit jurip man ka por ban khanglad ia ka jingdie tuh bad ban pynbun noh ia ka jingtian bishar bad pynngat sajia ia kiba donkti.
“Nalor kane, la dep leh eiei ruh halor ka kaiphod ba iadei bad ki jingkynnoh kiba hap hapoh ka Essential Commodities Act, 1955 bad ka Prevention of Black Marketing and Maintenance of Suppliers of Essential Commodities Act, 1980” ula ong.
“Ki jingbthah kila leit sha baroh ki DC bad ki SDO ba kin thaw ia ki District bad Sub Division Vigilance Committee ban tehlakam ia ka jingdie beain ia ki marbam” ong u Bah Coming.
 na Nongkren Bah Ardent M Basaiawmoit ha ka sngi Thohdieng, ula dawa ia ka Sorkar Jylla ban leh eiei pyrshah ia ki kam dawa pisa ba bun jait bun rukom kaba lam sha ka jingkiew dor ki mar ki mata hapoh ka Jylla.){kind=link}