Shillong, Nailur 21: U Symbud Myntri Rangbah ka Jylla ba khmih ia ka Tnad PWD (Roads) Bah Prestone Tynsong ha ka sngi Palei ula pyntip ba ka Sorkar Jylla kan sa leit iakren shen bad ka Sorkar Pdeng ban pynkylla noh ia ka surok Agia-Medhipara-Phulbari-Tura (AMPT) sha ka National Highway.
“Ngi kwah ban pynkylla ia ka surok AMPT sha ka National Highway lada ka Sorkar India ka mynjur. Ngin sa iakren bad ka Ministry of Road Transport ban pynkylla ia kane ka surok sha ka National Highway” ong u Bah Prestone haba jubab ia ka jingkylli bala wanrah da u MLA ka AITC na Rajabala Dr Mizanur Rahman Kazi ha Iingdorbar.
Ula ong ba naka 0.00 haduh 32.00 km, ka kam ka dei kaba la pyntrei na ka skhim Degradation Improvement jong ka AMPT Road bala bei tyngka da ka World Bank.
Ula ong ba naduh 33.00 haduh 41.00 km ka DPR ka dang don hapdeng ka jingpynkhreh bad naduh 42.00 haduh 66.00Km, ka surok ka dei kaba bha hynrei katto katne ki thliew kiba don, yn sa pyndap noh hadien ba kut ka lyiur.
U Bah Prestone ula iathuh ruh ba naduh ka 67.60 haduh 100.20 km, ka jingtrei ka kynthup ia ka jingpynhreh ia ka surok AMPT napoh ka skhim NESIDS katba naduh 100.20 haduh 103.00 km jong ka surok Garobadha-Selsella-Balachanda la bei tyngka da ka Sorkar Jylla bad ka surok ka dang bha kynthup naduh 103.00 haduh 124.00 km.
