Shillong, Nailar 25: U Nongialam ka Liang Pyrshah u Mukul Sangma hynne ka sngi Baar, ula ong ba ka jingiai bteng ka jinglang bad jingshlei um ha Jorabat Khanapara kadei namar ka jingpulom bad bym bit bym biang jong ka jingshna ha ki bynta jong ka National Highway.
“Kane ka lah iai jia mynta lah katto katne snem bad kala iai bteng la kum ba kam dei ka kam jongngo jongno ruh ban pybeit ia katei” ong u Sangma hadien ka jingwan jurip ia katei ka bynta jong ka surok ha ka sngi u Blei.
Ula ong ba katei ka surok kala kylla long kum ka jaka ban mih ka um namar ka jingbym biang ka rukom shna ia ki nala ha ki bynta jong ka surok kaba la buh pat ha ka jingma kaba khraw ia ki nongleit nongwan.
“Ka jaka ban mih ka um kala sahkut, kumta ka surok kala kylla long kum ka jaka ban mih ka um. Kadei ka kamram ka jongno ban pynbeit ia katei? Ula buh jingkylli.
Da kaba pynpaw ia ka jingsngewkhia halor ka jingshngain ia ka leit ka wan ha ka surok, ula ong ba ki bor kiba dei khmih kidei ban shim ia ka jingkitkhlieh ban shna, pynneh bad sumar ia ka surokbah kidei kiba hap ban bud ryntih ia ki kyndon jingbthah jongka Supreme Court Committee on Road Safety kynthup ia ka MoRTH bad NHAI.
Ula ong ba ki Ambulance kiba kit ia ki nongpang kila sahkut ha ka por ba shlei um bad kam shim la don ruh kano kano ka jingai jingtip ia ki paitbah.
U Sangma ula ong, baroh artylli ki sorkar Assam bad Meghalaya kidei ban sangeh noh ia ka jingiakynnoh iwei ia iwei hynrei kidei ban iatreilang ban pynbeit noh ia kane ka mat lyngba ka Road Safety Council bad Committee.
“Kane ka surok kaba pyniasoh ia ngi bad ka Guwahati International Airport. Ka long ka jinglehrain ba kim shim la peit ia kane kum ka bynta kaba sngewkhia” bad ka bynrap ba ka hukum jong ka iingkashari bad ki jingpynbna paitbah kila sah khlem kano kano ka jingpyntreikam khlem kano kano ka jingkitkhlieh.
