Shillong, Nailar 25 : U Nongialam ka Liang Pyrshah Mukul Sangma ha ka sngi Ba-ar ula ong ba ka Meghalaya ha ki snem ba la leit kala lah ban iakren sngewthuh bad ka Sorkar Pdeng halor ka kam tih uranium khlem da donkam ia ka resolution.
U Mukul ula kynthoh ia kane halor ka jingthmu jong ka Sorkar ban wanrah ia ka resolution halor ka kam tih uranium la sngi Balang ha Iingdorbar Thaw Ain ka Jylla.
“Lada phi iohi ia ki phew snem mynshuwa, ngi la lah ban iakren sngewthuh bad ka Sorkar India khlem da donkam ban kyntur lane pynbor, khelm da donkam ban wanrah ia ka resolution” ula ong.
Ula ong b aka dang kloi palat ban pyrkhat lypa ba kumno ka Iingdorbar kan leh haba bynrap “To ngin peit ynda kila wanrah ia ka resolution”.
U Myntri Rangbah barim ula ong ba man ki Sorkar ki dei ban leh ia kano kano ka kam kat kum ka jingsngew ki paidbah haba pynpaw ba man ki Sorkar ki don la ka jong ka lynti ban pynbeit ia kano kano ka kam.
