Shillong, Nailur 21 : U Symbud Myntri Rangbah ba khmih ia ka Tnad kam Pohiing (Police) Bah Prestone Tynsong, ha ka sngi Palei, ula pyntip ba ka jingtohkit ka dang iaid halor ka jingsiat iap ki shipai BSF ia u nongniah trok ha shnong Mawshun kaba jia ha ka 5 tarik Jymmang mynta u snem.
Haba jubab ia ka zero hour notice bala wanrah da u MLA ka NPP na Sohra Bah Gavin Miguel Mylliem ha Assembly, u Bah Prestone ula pyntip ba ki don artylli ki ejahar bala mudui halor kane ka jingjia.
Ha ka 5 tarik Jymmang, 2023 ha ka por 12:24 baje, uwei u nongniah trok (ML05-F-3885) ba kyrteng u Bah Running Nongkynrih ba na Jalynteng, ula shah siat haki shipai BSF ha shnong Mawshun marjan ka petrol pumo, NH-40 (surok Shillong-Dawki) Pynursla. Namar kane ka jingshah siat, une u nongniah trok ula iap hashen.
U pyntip ba kawei ka ejahar ka dei kaba la ujor da ki bahaiing une u rangbah u Bah Rivershkem Nongkynrih bad kawei pat ka ejahar ka dei kaba la ujor da u BSF pyrshah ia u ah Running Nongkynrih ha Pynursla Police Station.
“Ka jingtohkit ia baroh kine ki ejahar ka dang iaid bad ki Pulit kila trei shitom ban wad ia ka jingshisha bad ki daw jong kane ka jingjia” ong u Bah Prestone haba pyntip ba pat don mano mano ruh ba shah kem halor kane ka jingjia.
Kat kum ka ejahar bala ujor da u Bah Riverskhem, la pyntip ba une u nongmudui bad u bakha jong u, uba iap, ki dang leit sha Umthli ban kit ia ki muid sha u trai hynrei haba poi ha Mawshun, une uba iap ula phai sha ka mon ban pynhiar ia ki muij. Hynrei, ha katei ka por, kawei ka mini trok ki BSF kaba bud ia ki nadien, kala ieng bad khlem kano kano ka jingmaham, ki shipai BSF kila wan tyr sha u bad sha u Bah Running bad shu phareit kuli beit beit, kaba lam sha ka jingiap u bah Runing.
Ha ka ejahar ki BSF ba mudui pyrshah ia u Bah Running, ki BSF kila iathuh ba ha katei ka miet, ka Mobile Check Post (MCP) party jong ka G Company, 4th Battalion, kaba don duty ha surok Pynursla-Dawki marjan ka Wahkdiat, kila pynsangeh ia u nongniah jong kane ka trok ban talasi ia ka kali.
Hynrei ha ka jaka ban sangeh, une u nongniah ula pyrshang ban phet bad leit tynrah ia uwei u shipai BSF. La ong ba une u shipai haba iohi ia ka jingma, ula siat 2 kuli sha suin hynrei une u nongniah trok u khlem sangeh satia bad ula pyrshang ban tynrah pynban ia une u shipai.
Ka ong, haba iohi ia ka jingma, une u shipai ula siat biang sha ka taiar jong ka trok da ka jingthmu ban lah pynieng ia ka kali hynrei une u nongniah ula khun pynban sha ka liang ka diang bad tynrah ia u maw kyndoh ba phiah ia ka surok.
U Bah Tynsong u ong ba ka jingshah siat u Bah Running kala pynbitar lep ia ki trai shnong bad kala pynmih ia ka huri hura kaba jur bha.
“Namar ka jingima ia ka jinglong jingman ha ka thain, la pynjur bha ia ki bor pahara bad ki Pulit ka Jylla kila peitngor bha ia ka jinglong jingman” ula ong haba pyntip ba ia mynta ka jinglong jingman kala long kumba ju long ha ka thain.
 Bah Prestone Tynsong, ha ka sngi Palei, ula pyntip ba ka jingtohkit ka dang iaid halor ka jingsiat iap ki shipai BSF ia u nongniah trok ha shnong Mawshun kaba jia ha ka 5 tarik Jymmang mynta u snem.){kind=link}