Tura, Nailur 16 : Ka jingiakhih kaba jur kala ap mynta ha Garo Hills Autonomous District Council hadien ba ka Executive Committee kam shym la lah ban siew iaka tulop bala pynsahteng haduh 30 bnai, wat hadien ka jingaipor jong ki Nongtrei kaba kut noh ha ka 15 tarik Nailur.
Da ki spah ngut ki Nongtrei ka GHADC kiba don ha ka shatri jong ka Non-Gazetted Employees Association, kala aipor khatduh ia ka Executive Committee ba khlieh da u Albinush Marak jong ka NPP, hapoh ak 15 tarik Nailur ban siew pynkhuid noh ia baroh ka tulop ba pynsahteng.
Ki Nongialam kane ka synjuk kila iakynduh ia u CEM bad ka Executive Committee ha ka 29 tarik Nailar ban kyrpad halor ka tulop bad ruh ban buhpor artaiew ia ka EC ba kan pynmih pisa ha kaban siew noh ia ka hok ki nongtrei.
Kane ka synjuk ki Nongtrei kan shong jingialang lashai ka sngi Nyngkong ha Tura ha kaba ki nongialam kin sa pynbna ia ki sienjam ba kin shim bad kaei kaba la paw pyrthei ka dei ka jingsangeh treikam jong ki nongtrei, ka ban lam sha ka jingkhang khyrdep shisyndon jong kane ka Council.
Ka jingkhang kyrdep lada rai ki Nongtrei, kan pynsangeh lut ia baroh ki kam pynroi bad ka jingpynmih pisa khamtam ka jingsiew ia ki khajna bat jaka na kylleng ki 5 tylli ki District ka Ri-lum Garo.
Nalor ka jingktah ha ka khajna jaka, ka jingsam umbam umdih ruh ha kiba bun ki bynta ka Tura, kan sa shah ktah jur namar ka dei ka Council kaba dang peit ia ka jingsam um sha kiba bun ki shnong jong ka sor Tura.
Kaba kham pynsniew shuh shuh, ki khubor kila mih napoh ka District Council ba ka Executive Committee ka don jingthmu ban siew shuwa tang arbnai ka tulop kum ka instalment ba nyngkong bad sa arbnai un sa siew ha u bnai Nohprah.
Ki bor pyniaid jong ka District Council la pyntip ba kim shym la lah ban pynmih pisa ha kaban siew ia ka tulop ba pynsahteng jong ki Nongtrei kiba la dawa la slem ban pynkhuid noh.
Ha ka jingiakynduh ba khatduh hapdeng u CEM Albinush Marak bad ka EC lem bad ka synjuk ki Nongtrei bala khlieh da u Brithen M Sangma, la pyntip sha ki halor ki jingeh bad ki jingkordit ba hap ban mad da ki nongtrei ha kaban ioh pisa ban pyniiad iala ka iing ka sem bad ban siew bai skul iala ki Khun.
Kila pyntip ba ha ki katto katne ki skul, li kmie ki kpa kila sangeh ban phah skul iala ki khun namar ka jingbym lah ban sieew ia ka bai skul.
La pynbor ruh ia ki nongtrei ba kin shim ram na ki nongairam ha ka sut kaba heh tang ban ioh buh ia ka bam halor ka miej lane ban leit shim dawai dashin iala ki jong ki bahaiing hasem.
