Shillong Nailur 16: Ki nongtrei jong ka Mawmluh Cherra Cement Limited (MCCL) hapoh ka shatri Mawmluh Cherra Cement Employee Union (MCCEU) hynne ka sngi kila dawa naka sorkar ban pyntreikam noh iaka Voluntary Retirement Scheme (VRS) lane ka Golden Handshake iaki nongtrei khamtam ia kiba la jan shongthait.
Haba kren sha ki lad pathai khubor u President ka MCCEU bah Shanlang Diengdoh ula ong ba naduh 2017, ki nongtrei ka MCCL kila dawa naka sorkar ba kadei ban pyntyllun biang ia ka karkhana pynmih dewbilat ka MCCL lane ban ai noh da ka VRS iaki nongtrei.
U Shanlang Diengdoh u la ong ba ki nongtrei hapoh kane ka kynhun ki kwah ba kane ka karkhana kan khie im bad kan tyllun biang kumba long mynshwa khnang ba ki nongtrei ki ioh ka tulop kumba ki ju ioh ha ki snem ba iaid bha ka karkhana dewbilat.
“Ngi kyntu ia ki bor pyniaid ka MCCL bad ka sorkar ba kin pyrkhat bad ba kin shim ia ka jingkitkhlieh ba kin pynkhie im thymmai biang sa shisien ia kane karkhana MCCL bad ban ai noh da ka VRS iaki nongtrei khnang ba ki nongtrei barim ne kiba tymmai kin ioh ia ka hok jong ki” long u bah Diengdoh.
U bah Shanlang ula ong ba ha u 2017 ka sorkar ka tyrwa VRS sha ki nongtrei kumba 150 ngut bad mynta ki kwah ba ka sorkar kan ai noh da ka VRS sa sha kumba 170 ne 180 ngut eiei ki nongtrei kaban long kum ka jingiarap ia ki.
Ula kyntu ia ki Myntri sorkar bad kiwei de ki nongialam na kiwei ki seng sain pyrthei ba kin iakren ia kane ka mat hapoh ka Iing Dorbar thawain jong ka jylla.
