Shillong, Nailur 13: U Chief Executive Member (CEM) ka Khasi Hills Autonomous District Council (KHADC) u bah Pynïaid Sing Syiem ula pynshai ba ka khyrdop lum pisa lane ka Check Gate bala shah khang daki bor District Ri-Bhoi ha Umdihar ka hap haka jingpeit ka District Council hynrei la pyniaid da kiwei pat ki briew.
Lah ban kdew ba ki bor District ka Ri-Bhoi kila khang noh iaka khyrdop lum pisa lane ka Check Gate kaba don ha surokbah National Highway-6 ha Umdihar Ri Bhoi haka 12 tarik mynta u bnai hadien ka jingujor ki kynhun nongniah Trok da ka jingkynnoh ba kane ka khyrdop ka khrong pisa ba ki trok ba rung shapoh ka jylla.
Shisngi hadien ka jingshah khang kane ka khyrdop, u CEM ula pynshai ba kane ka khyrdop ka dei jong ka KHADC hynrei la pyniaid pat ia ka da kiwei pat ki briew ne kynhun bad ula iathuh baka KHADC kala phah daka Show-Cause Notice sha kiba pyniaid ia kane ka khyrdop.
U bah Pyniaid ula iathuh ba ka KHADC kala pan jingpynshai hapoh 7 sngi bad lada ka jubab ba ki ai kam iahap, naka liang ka district council kan shim daki sienjam ba tyngeh bad ka lah ruh ban khang syndong ia kane ka khyrdop.
Haba kylli halor ka jingpynbna jong ka sorkar ba dei ban khang ia baroh ki khyrdop haki surok bah Highway, u CEM ula ong ba kane ka khyrdop ka dei kaba la treikam da ki phew snem.
Kat kum ki Rule jong ka Sixth Schedule, ka bor ban pynieng ia ki khyrdop ka dei kaba la ai da ka High Leval Committee bala khlieh da u Myntri Rangbah ka Jylla. Kane ka jingaibor ka shah ia ka ka KHADC ban pynieng iaki khyrdop ban talasi iaki Trok ba wan na bar jylla khamtam kito kiba wan khlem ki kot ki sla ba biang.
U CEM ula pynksan ba ka KHADC kala pynieng ia kine ki khyrdop katkum ka jindon ki jaka.
