Shillong, Nailur 11 : Ka Meghalaya College Teachers’ Association (MCTA) ha ka sngi Nyngkong, kala rai ban pynbteng ia ka jingiakhih da kaba sangeh shim klas (boycott) ia ki samla pule ka First Semester jong ka Four Year Under Graduate (FYUP) namar ka jingbym seisoh ka jingiakren bad u Vice Chancellor ka NEHU halor ka jingpyntreikam ia ka National Education Policy, 2020.
Hadien 40 sngi duna ba iaid ka jingiakhih, ka MCTA kala shah khot iakren ha u VC ka NEHu Prof PS Shukla ban wad ia ki lad ki lynti ban iapynbeit noh iaki jingiapher jingmut halor ka jingpyntreikam ia ka NEP. Hynrei, kane ka jingialang kam shym la poi sha ka jingiasngewthuh jingmut, kaba la pynbor ia ka MCTA ban rai pynbteng biang ia ka jingiakhih.
U General Secretary ka MCTA Dr. Airpeace W. Rani, ula iathuh ba u VC ula kubur ba ki don ki jingbym biang ha ka jingpyn bna (Notification) bala pynmih ha ka 12 tarik Naitung ban pyntreikam ia ka NEP2020 ha baroh ki College bala pyniasoh bad ka NEHU.
Une u Nongialam ka MCTA ula ong pat ba u VC ula kyntait ban weng noh ia kane ka jingpynbna, da kaba aidaw ba kam shym la don kano kano ka jingujor pyrshah na kino kino ki Principal jong ki College.
Namar kane ka jingkyntait u VC wat hapdeng ka jingkubur ba ki don ki jingbym biang ha ka jingpynbna, ka MCTA kala jied ban pynbteng biang ia ka jingiakhih tad haduh ba u VC ula shim ia ki sienjam ba iadei badkane ka jingpynbna.
