Guwahati, Nailur 11 : Ka Sorkar Assam kala pynkhreh ban sdang noh ia ka jingkem ia ki briew kiba iashongkurim khynnah ha Assam, ong u Myntri Rangbah ka Jylla Himanta Biswa Sarma uba la iathuh ba ki Pulit kin sa kem noh ia kumba 3000 ngut ki shynrang ha kine ki khyndiat sngi ban wan.
Haba iakren bad ki nongthoh khubor hadien ka jingialang jong ka National Excutive ka BJP Women’s Wing, ula ong “Dang shen, nga la kem ia 5000 ngut ki briew ha ka jingiakhun pyrshah ia ka kam pyniashong kurim khynnah ha Jylla. Ngin sdang biang ia ka jingkhynra pyrshah ia kane ka kam ha kine ki 10 sngi ban wan”.
“Mynta ka kynti, ngan kem haduh 2000-3000 ngut ki briew namar ka jingiashong kurim khynnah. Ngi hap ban pynduhjait ia kane ka jingmlien ba ktah ia ki Khynnah Kynthei” ula ong.
Ula ong ba ia kane ka jingkhynra la pynsangeh shuwa namar u dang dap ban kut ka jingialang jong ka G20 hynrei mynta baka G20 kalakut noh hynnin ka sngi U Blei, ka Sorkar kan sdang biang ia ka jingkhynra ban pynduhjait ia ka jingpyniashong kurim khynnah hapoh ka Jylla.
“Kin dang iai bteng ban shah iuhroit katba ngim pat lahban pynduhjait ia kane. Ka ain kala ong shai kdar ba ka kam pyn iashongkurim khynnah ka dei kaba beain, hynrei ka dang iai jia hi, kane ka dei ban kut noh” ula ong.
“Nga ngeit da ka jingpynkut noh ia ka (triple) talaq, iashong kurim khynnah bad ri bun lok, ka kam ba ngi la leh na ka bynta ka jingbha ki Muslim ka dei ka bym pat ju leh da ka Sorkar Congress mynno mynno ruh” ong u Himanta.
Ha u bnai Rymphang mynta u snem, haduh 2600 ngut ki briew kila shah kem ha ki Pulit ka Assam ha ka jingkhynra pyrshah ia ka kam pyniashong kurim khynnah hapoh ka Jylla.
