Shillong, Nailur 08 : U Myntri ka Tnad bording Abu Taher Mondal ha ka sngi Thohdieng, ula pyntip ba ka Tnad kala bthah ia baroh ki kompani mobile service provider ba kin siew pynkhuid noh mar mar ia ki bai bording elektrik ba ki pynsahteng khnang ban lait na ka jingshah ot bording.
“Ngi la dei iakren bad ki (mobile service providers) ba phi dei ban siew noh mar mar ia ki bill lem kumta yn ot noh ia ka bording. Lada kim siew ia ka bill lah slem, khlem pep ngin ot noh ia ka bording” ong u Mondal haba iakren bad ki nongthoh khubor.
U Myntri ula pyntip ba ki don ruh ki jingkyrpad ba thymmai kiba la wan sha ka Sorkar Jylla ban ai bording hynrei kine ki kam ki dang don hapdeng ka jingbishar.
Haba kylli, u Mondal ula ong ba ka Tnad mynta kala kham phikir bha ban pynthikna ba kan ym don ka jingthut haba iadei bad ka mobile network hapoh ka Jylla.
“Ngi lah ban leh da kaba tyngeh mynta hi hynrei shisien ba ngi la ot bording sha baroh ki tower, phin sa iohi ia kaei kaba long ba man haba iadei bad ka network jong ka phone…namar kata ngi hap ban da bishar bha ba ngi dei ban ioh ia ki bill bad ha kajuh ka por ba ngin kham pynjynsur ha ka jingot bording mar mar sha baroh ki mobile tower” ula ong.
“Ki don ki kompani kiba la phet khlem da siew ia ki bill bad kumta ngi la kham pyrrkhing ia kane ka bynta hynrei ngim lah leh eiei namar ki paidbah kila pynbor ia ngi ban ai bording sha ki mobile tower ba thymmai. Kumta ngi la pynbor kylla ia ki kompani ba kin siew noh ia ki bill bad lehse kila don kiba la siew ruh” ula bynrap.
