Shillong Nailur 07: Ki kynhun sengbhalang kila pynpaw iaka jingartatien ba ka Sorkar Pdeng kan lah ban pynurlong iaka jingthmu ban pynurlong ia ka ‘One Nation’ ‘One Election’ khamtam haba ka ri India kadei ka ri kaba heh bad kan long kaba eh ban ioh iaka elekshon kaba khuid kaba suba.
U President jong ka HYC u Bah Robert Kharjahrin ula ong, ba ka ‘One Nation’ ‘One Election’ kadei lypa ka mat elekshon jong ka BJP la kham slem bad haba phai sha ka histori jong ka ri India naduh u snem 1950 ter terla pynlong tang ia kawei ka elekshon ha kaba ha kajuh ka por la jied ia ki MP bad ia ki MLA ha ka ri baroh kawei, hynrei hadien kane namar ba don ki iingdorbar thawain kiba la shah pynkut noh bad kala don ruh ka jingpynjari iaka President Rule haka ri India katei ka rukom pynlong elekshon kala kylla noh. Hynrei ban pynlong biang ia kawei ka elekshon ha ka ri baroh kawei kala eh than mynta”.
Ula kubur ba lada pynlong tang ia kawei ka elekshon kan don ka jingmyntoi ha kaba iadei bad ka jingpynlut pynsep namar ka ri India.
“Haba ka ri India ka pynlong iaka MP Elekshon ha u 2019 kala pynlut haduh T.1900 Klur hynrei lada pynlong elekshon hajuh ka lah ban tyngkai haduh T.1000 Klur bad kan iarap ruh ha kaban ioh ia ki sorkar kiba skhem ha ki jylla namar kan duna noh ka jingtuklar bad ki paidbah ruh kin ym lut por ha kaba ki leit beit shi sngi ban thep vote iaka MP bad MLA elekshon bad wat ki heh myntri sorkar kin duna noh haka jingleit ialap elekshon ha ki jylla hynrei kin ioh ban pynleit jingmut ha kaban trei ia ka kam ka jongki” ong u Bah Robert.
Ha kaba iadei pat bad ka jingktah jong ka jingpynlong tang kawei ka elekshon u Nongialam ka HYC ula ong, ka ri India kala heh palat bad kumno yn pynbiang ia ki jingdonkam naduh ki Pulit bad ki shipai ban pynthikna ban pynlong iaka elekshon kaba khuid ba suba, namar wat tang ha ka elekshon ha Meghalaya la bun da bun tylli ki pyrton pulit ban pynthikna ba ka elekshon kan iaid beit ban ym don kano kano ka kynrum kynram.
“Lada mynta la pynlong ha ka juh ka por ia ka elekshon yn lah ne em ban pynbiang ia ki bor pahara ha ka por elekshon, ki ophisar kibanlong kum ki Obsrver ne nongpeit pyrman, ka jingdonkam bun tylli ki kor EVM namar ki juh ki EVM kiba pyndonkam ha Meghalaya ynda la kut ka 45 sngi ia kitei ki EVM la rah ban pyndonkam pat sha kiwei ki jylla. Kawei kaban ktah bha iaka jylla ka long ba ia ki mat ialap elekshon yn poi iakren noh ia kiba iadei bad ka ri India bad kine ki jong ka jylla kin shah kyntait noh bad kiban mad jingeh bha kin dei ki seng riewlum namar ka jingsaphriang ka lyer elekshon bad ka jingiakren jong ki briew kan long beit halor ki mat kiba iadei bad ka Ri Baroh kawei bad ki seng riewlum ki lah ban rem ha ki elekshon MLA ki jongki” ong u Bah Robert.
“Nga la ioh pule ia kawei ka jingthoh ba lada pyntreikam iaka One Nation One Election, kin don kumba 18 ne 19 tylli ki jylla kin hap ban pynkut noh iaka samoi treikam jong ka iingdorbar thawaiñ ki jongki bad kane kan kynthup ruh iaka jylla Meghalaya kaba dang shu dep jied ia ki MLA ha u 2023 bad lada pynkut noh yn hap ban ban ialeh iala elekshon ha u 2024 ha kaba ki MLA kiba jop kim pat lah ban trei eiei ne pynpaw kam eiei naduh ba ki jop ha u 2023” ong u Nongialam ka HYC.
Na ka liang u President ka KSU u Samla Lambokstarwell Marngar ula ong, “Ka jingthmu ban pynlong noh tang kawei ka elekshon hapoh ka ri India kam long kaba iahap namar ioh lehse kita kiba thmu ki tip khambha ki kheiñ jingkheiñ kumno bad nga shu iohi ba ka don eiei sha lyndet bad kine ki briew hashwa ban shim ia katei ka rai kila dep ban leh lypa iaka ‘Homework’ ka long thik kumba ki leh ha ka por ba ki pynkylla ia ka pisa jong ka ri”
Ula ong, ba ka seng ka sngew ba kane ka jingthmu ban pynlong tang kawei ka elekshon kam long kaba iahap hynrei ka dang lah hi ka rukom pynlong ia ka elekshon ha ka rukom kaba rim bad ka sorkar India ha ka jaka ban pyrkhat ia kata ka jingpynlong tang ia kawei ka elekshon kala dei ban pyrkhat pynban kumno ban ialeh ban kyntiew iaka ioh ka kot, ka pule puthi, ka koit ka khiah jong ka thaiñ shatei lammihngi.
“Ha ka por ba long elekshon ha West Bengal, ki bor pahara kila don lut ha katei ka jylla hynrei ka jingiaumsnam ka long kaba shyrkhei bad ha man ki elekshon ha ka ri India ka mih beit ka jinghuri hura, jingiakynad bad lada pynlong ia ka elekshon ha kajuh ka por ha baroh kawei ka ri, kita kiba rai kin sa sngewthuh hi kaei kaban jia ne lehse kila pynkha shuh ia kita ki bor pahara na sahit bneng bad kin ym lah ban tem ia ki jingiakajia bad haba ngi shim nuksa, tang ka jingiakynad ha Manipur hapdeng u Kuki bad u Meitei kim lah ban tem, te mutdur lada pynlong iaka elekshon ha baroh kawei ka ri kin lah ban tem ia kita ki kynrum kynram bad ha katei ka por ngin hap ban shu sakhi iaka jingiadung bad ka jingiamait kawei ka kynhun ia kawei pat” ong u President ka KSU.
Katba u President ka FKJGP u Bah Dundee Cliff Khongsit ula ong, “Lada peit ha ka jingpynlut pynsep ka long kaba biang bha bad kan ym pynlutkai ia ka por hynrei kan long kaba eh bah ban pyntreikam ia kane hapoh ka ri India baroh kawei, namar ba kan ym don ia ki bor pulit ban lah ban pahara ha kajuh ka por ha kylleng ki jylla ban pynlong ia ka elekshon ha ka shi sngi bad ka lah ban pynmih kylla ki jinghuri hura bad kane ka jingsdang jong ka Sorkar NDA ban pynurlong ia ka jingangnud jong ka seng naim RSS”.
Ula ong, namar ka jingbym lah ban pynbiang ia ki bor pahara kin mih beit ki jinghuri hura ha kylleng ki jaka bad yn ym lah ban pynthikna ba ka elekshon kan long kaba iaid beit iaid ryntih.
“Ka jingkylli kaba mih ka long ruh ba ki don bun ki jylla kiba dang shu dep ban jied ia ki MLA bad ki don ruh ki jylla kiba ka samoi treikam jong ka iingdorbar thawain kan kut ha ki snem ban wan, kumta ha kano ka dur yn pynlong biang ia kawei ka elekshon ha ka ri baroh kawei” la buh jingkylli u Bah Dundee.
