Shillong, Naitung 15: Ka Association of Power Engineer ka Meghalaya Energy Corporation Limited (MeECL) hynne ka sngi thohdieng kala ong ba ka Sorkar Jylla kam dei ban pynbor ia ki paidbah ban pyndait ia ki Smart Meter namar wat ka Sorkar India kam shym pynlong kongsan (mandatory) ia kane ka kam.
“Ka jingpyndait ia ki smart meter kam dei ban long kaba hap leh beit (mandatory) naba wat ka Sorkar India kam shym la pynlong kongsan ne hap ban leh beit” ong u President ka Association Bah Arju Dkhar haba iakren bad ki lad pathai khubor hadien ka jingialang General Body.
Hynrei ula ong pat ba ka Sorkar Jylla ka dei ban kiar ha ka jingpyntreikam lyngkhot lyngkhot ia kane ka project .
“Haba phi ong ba phi lah pyndait ia ki smart meter katba ki meter reader kin hap ban leit khmih, kane kam dei shuh ka smart hynrei ka dei ka jingpynbeij ia ngi. Phim lah ban pynbiej ia ki nongpyndonkam bording bad phi ruh ki nongthang bording ruh phi dei ban tip ia kane” ula ong.
Haba pyntip ba un sa pyndait ia ka smart meter hala ka jong ka Iing, u Bah Arju ula ong, kane ka dei halor ka nongrim ba un lah ban peit ia ka jingpyndonkam bording, ka bill bad kiwei kiwei.
“Hynrei tang kawei ka long ba sngewbha wat pynlong kongsan. Sngewbha pyrkhat lem ia ki paid nongkyndong jong ngi ki ba ju siew bai bording tang hapoh T. 120 shibnai hynrei da phi pyndait ia ki smart meter ka don ruh ka jinglut. Ngam tip la ki don ne em ia ki smartphone. Nga dei uei ban bishar hynrei kawei ka long ba hato kin lah ne em ban siew ia ka jinglut kaba tam” ong u Bah Arju.
Haba kylli, u Bah Arju u ong ba ka shong ha ki nongthang bording la kin pyndait ne em ia u smart meter haba bynrap “ Hynrei sngewbha kylli na ka Sorkar Jylla la ka dei ka kam ba hap leh beit ne kumno. Ai ba kan pynbna ia kane”.
Haba pdiang ia ka rai jong ka Sorkar ban phiah noh la ka jong ia ka kam Chairman bad Managing Director jong ka MeECL, une u Nongialam ki Engineer ula ong baka jingioh ia ki briew ba tbit kum u CEM ka Generation, Transmission bad Distribution ka dei ka sienjam kaba ngi pdiang sngewbha.
“Da ka jingdon ia u Myntri ka Tnad Bording kum u Chairman ka MeECl, un sa long u jingkieng ba pyniasoh hapdeng ki myntri sorkar, ka sorkar, ka MeECL bad ki shnat jong ka” ula ong.
