Shillong, Nailur 04: Ka Voice of the People’s Party (VPP) hynne ka sngi kala dawa na u myntri rangbah ka jylla u Conrad K Sangma ban pynkynriah noh mardor ia u Superintendent of Police (SP) bad ia u Deputy Commissioner (DC) ka East Jaintia Hills halor ka jingkynnoh ba ki bor district kila pyndonkam bakla iaka bor haka por pynlong iaka Public Hearing ha Thangskai.
Ia kane ka jingdawa ka VPP kala pynsngew haka jingleit kynduh ia u myntri rangbah hapoh ka ingsah.
Haba kren sha ki lad pathai khubor hadien ka jingialang u general secretary ka VPP u Dr. Ricky A. J Syngkon ula ong ba ka jingleh ki bor pulit iaki paidbah khamtam iaki longkmie ba pyrshah iaka Public Hearing ka long kaba ishait met bad ka bym lah ban pdiang.
“Ngi la dawa ba dei ban kynriah kam shwa ia u SP bad DC ka East Jaintia Hills bad ban pynlong ka jingtohkit bniah halor ka jingpyndonkam bakla ki Pulit iaka bor bad haka juh ka por dei ruh ban wengkam shipor iaki Pulit ban donkti ban shoh pynmynsaw iaki paidbah khamtam iaki longkmie” la ong u Dr. Syngkon.
U Dr. Syngkon ula ong ruh baka Party ka dawa na u myntri rangbah ban phah kem iaki nongtrei ka TopCem kiba donkti ban pynshit iaki Pulit ban bom bad tied iaki paidbah kiba pyrshah iaka Public Hearing.
Nalor kane ka VPP kala dawa ruh ban pynlong ka jingtohkit pyrshah iaka Meghalaya State Pollution Control Board (MSPB) halor ka nongrim baka MSPB Kala pynkhien iaka hok bad ki kyndon jong ka Public Hearing daka ba kyntait iaki katto katne ki kynhun ban wan shim bynta ha kane ka Hearing.
Haba kylli u Dr. Syngkon ula iathuh ba naka liang u myntri rangbah ula kular ban bishar ia kine ki jingdawa ka Party hashuwa ban shim iaka rai.
